Familie-Sondae het mos hul manier. Hierdie was só ’n een. My oorlede ma se suster en haar man, wyle oom Felix, het al die pad van Pretoria af Arnot toe gery vir ’n Sondagnoenmaal op Elandsfontein. Dit moes een of ander geleentheid soos ouma se verjaarsdag of so iets gewees het. Ek kan dit nie onthou nie. Ons “kinders” was ook daar – my suster en haar man, en losloper-ek op my eie. Die “grootmense” het in die sitkamer gesit en ’n voorvreet-dop gedrink. Ek was al in my twintigs, maar ons was steeds “die kinders”. Ons plek was buite in die skadu van die moerbeiboom, waar ons gesien, maar nie gehoor kon word nie. Ons is op ’n Sondag tot een bier elk gerantsoeneer – dít terwyl ek al ’n offisier in PW se bende was en ook sterk op pad om graad te vang.
Dis toe dat oom Felix so deur die oop sitkamervenster daardie Sondag se dinge aan die rol sit met: “Pierre, jou pa het gesê jy moet gou voor ete vir my ’n blesbok gaan skiet sodat die ding effe kan afkoel voor ek terugry Pretoria toe!” My protesterende: “Ons skiet nie op die Sabbat nie en ek het al byna ’n