‘LAAT ONS SY LEWE VIER. DIS WAT ONS SY BEGRAFNIS OOK NOEM: ’N LEWENSVIERING. HY WAS SO ’N WONDERLIKE MAN’
DIE stootwaentjie met die pienk kombersie langs die voordeur is die eerste wenk dat daar ’n nuwe lewetjie in die huis hier op die Val de Vie-landgoed is.
In die leefvertrek is dit weer die speelmat wat dadelik jou oog tref. En dan bevestig die huilstemmetjie uit die babakamer: Hier is ’n nuutgebore mensie in die huis.
Maar toe Anzél Rabie (32) met die klein lyfie in haar arms te voorskyn kom, kan ’n mens die warboel van emosies in haar gemoed aanvoel. Moederliefde en trots, ja, maar vlak agter die moedige glimlag is ook groot hartseer en verlies te bespeur.
Sewe weke tevore het sy en haar man, Stefanus Rabie, die heuglike aankoms van klein Aloha, hul eersteling, gevier.
Maar ná die blydskap het groot tragedie gevolg.
Want net vyf dae voor Huisgenoot se besoek is Anzél se pa, die Springboklegende Theuns Stofberg (68), deur ’n motorongeluk van haar af weggeruk.
Binne enkele weke het sy haar babadogter verwelkom – en haar geliefde