‘DIE KLIMAATSKRISIS HET ONS GETREF EN DIT NOODSAAK ALMAL OM ONS MANIER VAN DINGE DOEN TE HEROORWEEG’
DIT lyk soos tonele uit ’n fliek oor die einde van die wêreld. Maar dié tonele is nie fiksie nie; dis die nuus – én dit word boonop van reg oor die wêreld af na ons skerms gestuur.
Mense wat vlug voor verwoestende veldbrande, alles weens hittegolwe wat die een temperatuurrekord ná die ander breek. Haelstorms en stormsterk winde. Die hemele wat oopmaak met ’n stortvloed reënbuie. Van Griekeland tot Kanada, Algerië tot Suid-Korea – groot dele van die wêreld steier die afgelope maande onder kwaai weerstoestande. En die gevolge is nie gering nie.
“Klimaatsverandering is hier. Dit is skrikwekkend. En dis net die begin,” het die Verenigde Nasies se sekretarisgeneraal, António Guterres, verlede maand op ’n mediakonferensie gesê.
Hy het pas statistieke bekendgemaak wat die nekhare laat rys: Julie 2023 was waarskynlik die warmste maand ooit op aarde. En as die temperature wêreldwyd aanhou styg soos dit tans doen, is