BOERE in Noordwes en die Noord-Kaap wat katoen binne ’n wisselbouprogram plant, kán wen. Só sê Jozeph du Plessis, lid van Graan SA se uitvoerende komitee en direkteur van Katoen SA, die bedryfsliggaam wat die hele katoenwaardeketting in Suid-Afrika verteenwoordig. Hy het belangstellende boere te woord gestaan op ’n inligtingsdag op sy plaas buite Schweizer-Reneke in Noordwes.
Die Noord-Kaap is lank reeds ’n goeie katoenproduserende gebied en van die land se beste vesel word langs die Oranjerivier onder besproeiing geproduseer. Noordwes hou ook groot potensiaal onder droëlandproduksie in. “Daar is geleentheid vir boere in Suid-Afrika om meer katoen te verbou vir uitvoer, asook om die plaaslike verbruik op te stoot. Die klimaatsomstandighede van Noordwes en die Noord-Kaap is ideaal vir katoen wat baie hitte-eenhede nodig het om suksesvol te groei,”