Suid-Afrika beleef ’n energiekrisis – letterlik en emosioneel.
In 2022 was die kumulatiewe ure beurtkrag 3 630, volgens die Wes-Kaapse premier, Alan Winde, in BusinessTech. Dít knou die ekonomie en dra by tot ’n werkloosheidsyfer van in die 40 persent. Almal wag, oënskynlik tevergeefs, op Eskom om sinvolle oplossings vir lig in ons lewe te vind.
Suid-Afrikaners is ook steeds aan die gons oor Phala Phala, oftewel “farmgate”, toe miljoene dollars na bewering by pres. Cyril Ramaphosa op sy wildsplaas naby Bela-Bela gesteel is en hy glo versuim het om dit by die polisie aan te meld.
Korrupsie gedy oral en jy voel gedreineer as jy na al dié nuus luister.
Daarom is dit belangrik om ons positiewe energie te koester, sê Mari van der Merwe, ’n sielkundige van Melkbosstrand. Doen ons dit nié, kan dit ons geestesgesondheid beïnvloed en tot angs en depressie lei. “Dan kan jy nie jou eie lewe verbeter nie, laat staan dié van jou mede-Suid-Afrikaners.”
Gelukkig was daar nog altyd energiegewers om ons om hoop te gee, soos die ontslape Madiba, eerste president van die demokratiese Suid-Afrika