HIEROOR PRAAT ONS
Toekomsfiksie
[toe·koms·fik·sie]
’n Sambreelterm vir spekulasiefiksie, wetenskapfiksie en fantasie.
Soms voel dit asof die lewe nie méér onseker en onvoorspelbaar kan wees as nou nie – ons leiers het voete van klei, die ekonomie wankel, die oorlog woed voort, ’n potensieel gevaarlike asteroïed is in November hier verby (“naby” in kosmiese terme) en nog een is op pad, en selfs koningin Elizabeth, ’n baken van stabiliteit, het ons ontval . . .
Jy kan jou dan kwalik indink dat daar mense is wat ’n lewe daaruit maak om nog erger toekomswêrelde te verbeel. Maar toekomsfiksie is wêreldwyd gewilder as ooit en meer as net ontvlugting van ’n moeilike werklikheid – dié genre gee dikwels ook moontlike antwoorde op kwessies waarmee gewone mense worstel. “Ernstige fiksie laat ’n mens dink oor hoe ons lewe, en hoe ons kan lewe. Toekomsfiksie neem daardie oorwegings die toekoms in. Dit ondersoek hoe ons en ons kinders se leefwêreld môre en oormôre kan lyk, én hoe dit geraak kan word deur wat ons vandag doen,” sê Hester Carstens, uitgewer by Queillerie.
Daniel Cohen, klimaatsaktivis en assistent-professor in sosiologie aan die Universiteit van Kalifornië, Berkeley, meen om werklik die hede te kan verstaan moet jy jou die toekoms kan verbeel – en kan terugkyk om die hier en nou.
