Daar kan nie genoeg klem gelê word op die gasvryheidsafdeling van die wildbedryf nie, sê Richard York, uitvoerende hoof van Wildbedryf SA (WRSA). Jag is lankal nie meer die enigste doel van internasionale trofeejagters wat safari’s na Suid-Afrika onderneem nie. “Dit is net ’n deel van die Afrika-ervaring waaraan die jagter se hele gesin die afgelope klompie jare ál meer meedoen.”
Jag is dikwels die trekpleister en die jagbestemming is in die meeste gevalle die eerste indruk wat besoekers uit die buiteland van Suid-Afrika kry. Daarom moet dit ’n wêreldklas-ervaring wees, sê Richard.
WRSA is nou betrokke by die bemarking van jagbestemmings onder plaaslike en buitelandse jagters. WRSA is juis ook besig om ’n aanlyn platform vir besprekings te ontwikkel omdat baie van die ander verblyfbesprekingsplatforms nie kliënte toelaat wat op hul eiendom laat jag nie.
Hoewel wetgewing vereis dat jagters uit die buiteland wat nie in Suid-Afrika woon nie, hul jagtog deur ’n jagondernemer bespreek en dat hulle tydens die jag deur ’n beroepsjagter vergesel moet word, is daar baie wildplase wat ook ekotoerisme aanbied. WRSA hoop om besprekings vir sulke besoeke deur die nuwe platform moontlik te maak.
Omdat safari’s na Afrika deesdae as gesinsaktiwiteite beplan word, is dit belangrik vir jagondernemers om meer as net hul bestemmings te bemark. Toere wat besoekers in staat stel om dele van Suid-Afrika te sien