Houtskool & swart
Altyd stemmingsvol
Houtskool is ’n ou gunsteling teen fokusmure waar dit ’n kontemporêre gevoel en voorkoms na enige ruimte bring – ook die slaapkamer. Dis hoekom Izette Carinus van die plaas Fransmanskraal buite Stellenbosch hierdie donker skakering gekies het toe sy een van die ou geboue op haar eiendom in ’n gastehuisie omskep het as uitbreiding van haar trou-venueonderneming. Danksy oorgenoeg natuurlike lig laat die kleur nie die vertrek donker voel nie. Staalkabinette as bedkassies gee ’n moderne kinkel aan die plaashuisvoorkoms.
Donker diepte
Toe Lizelle en Nico Janse van Rensburg hul huis in Melville, Johannesburg, opgeknap het, het hulle ’n deel van die oorspronklike siersteenmuur agter hul braaiplek ongepleister gehou, in pas met die stene daaronder. Donkergrys mure rondom beklemtoon die boogvorm en versterk die atmosfeer.
Groen
’n Groen plafon? Hoekom nie!
Len en Faith du Plessis het in 2017 ’n ou huis in Knysna gekoop wat jare lank verhuur was – die bure het dit die “lelike eendjie” genoem. Maar Len en Faith het die moontlikhede van ’n elegante swaan gesien.
“Die huis was nou wel afgeleef en donker binne, maar die struktuur was stewig. Ons het darem van die begin af geweet ons sou ons hande moes vuilmaak en slim planne maak om dit leefbaar te kry,” sê Len.
Hul handewerk het soveel indruk gemaak dat hulle as naaswenners aangewys is in ons Regruk met Flair-kompetisie van 2017 – en hierdie treffende eetkamer was een van talle hoogtepunte wat tydens die beoordeling die Tuis|Home-span se aandag
