Boontjiesop met frikkadelletjies
Genoeg vir 6 • Voorbereiding: 30 minute Gaarmaaktyd: 30 minute
• 45 ml olyfolie
• 1 ui, fyngekap
• 2 preie, fyngekap
• 2 mediumgroot wortels, geskil en fyngekap
• 2 stingels seldery, gekap
• 500 g vars varkworsies
• 1 knoffelhuisie, gekap
• 2 blikke (400 g elk) gemengde bone, gedreineer
• 1 blik (400 g) gekapte tamaties
• 750 ml hoenderaftreksel
• ’n strooisel vars basilie of gekapte pietersielie (opsioneel)
1 Verhit 30 ml van die olie in ’n middelslagkastrol en braai die ui, preie, wortels en seldery saam tot glansend (minstens 5 minute, 10 as jou tyd toelaat).
2 Verwyder intussen die derm van die varkworsies en rol die vleis in piepklein frikkadelletjies. Mik vir 6-8 per worsie, wat ’n lekker grootte saam met die sop gee.
3 Roer die knoffel, bone, tamaties en aftreksel by die sop; laat prut vir 20 minute. Proe, en geur na smaak met sout en peper. Oordeel ook die tekstuur (ek hou daarvan om die helfte van die sop met ’n staafmenger fyn te maak).
4 Braai intussen die frikkadelletjies in die res van die olyfolie tot goudbruin en gaar. Skep dit dan met die geurige olie en al in die sop of verdeel dit tussen geskepte bakkies sop. ’n Strooisel vars kruie of ’n skeppie basiliepesto is ’n opsionele ekstra.
Wenke
• Kap die groente lekker klein om geur tydens die vinnige gaarmaak te bevorder. Die voorbereiding neem dalk 5 minute langer, maar dis die moeite werd.
• As jy nie wil frikkadelle maak nie, bak die heel varkworsies in jou lugbraaier vir sowat 15 minute (of tot gaar) teen 180 °C terwyl die sop prut en sny die gaar worsies eenvoudig in skyfies voor jy dit voorsit. Onthou om die worsies halfpad deur die gaarmaaktyd in die braaier om te draai.
• Brosgebraaide spek is ook lekker in die sop.
Kom ons begin met VARKWORSIES
Romerige varkworsieen-sampioenpasta
Genoeg vir 4 • Voorbereiding: 25 minute Gaarmaaktyd: 25 minute
• 15 ml olyfolie, plus ekstra indien nodig
• 200 g bruin sampioene, gekap
• 6 vars varkworsies met salie, derm verwyder
• 2 knoffelhuisies, gekap
• 250 ml room
• 300 g pennepasta
• ’n groot klont botter
• 8 vars salieblare
• 60 ml gerasperde parmesaankaas
Verhit die olie in ’n dikboompan
