Die sleutelwoord vir volhoubare veeboerdery is winsgewendheid. Die vraag bly egter steeds hoe gemaak moet word om daardie ekstra paar rande te kry wat ’n boerdery se lewensbestaan in moeilike tye kan help verseker.
Chris Richter
Genetiese verbetering, inskakeling by die waardeketting verder stroom af en doeltreffende bemarking is van die toerusting in ’n veeboer se gereedskapkis om winsgewendheid te verhoog, sê Chris Richter, Simbra-boer en -stoetteler van Bloemfontein.
Richter Simbras lewer gereeld bulle van topgehalte op en het al ’n reeks eerbewyse ontvang.
“Jy moet jou produksie kan verhoog en jou koste verlaag. Om produksie te verhoog, gaan teelmateriaal en vrugbaarheid die belangrikste faktore wees,” sê Chris.