WAT het Indiana Jones, National Treasure, Lara Croft en televisiereekse soos Expedition Unknown in gemeen?
Aksie, avontuur, stof, goggas, spinnerakke en natuurlik die argeoloog. Held of helper, skurk of skobbejak, oor die jare heen is talle boeke, flieks en stories oor die dapper dade van die argeoloog geskryf. En dié rol is dikwels as ’n aksieheld op ’n jaagtog uitgebeeld.
Volgens Danielle Vander Horst kan niks kan verder van die waarheid verwyder wees as sulke wilde avonture nie.
Sy is ’n doktorale student in klassieke argeologie aan die Duke-universiteit in Amerika. As argeoloog was sy by verskeie projekte in Italië betrokke, en haar toeganklike en eerlike skryfstyl gee lesers ’n kykie in die wêreld van ’n hedendaagse argeoloog.