Onkruidbestryding in aangeplante weiding is ’n taamlik onbekende veld omdat so min navorsing daaroor gedoen en min chemiese middels vir die bestryding van onkruide al geregistreer is. Baie nuwe grasspesies wat gevestig word, kan heeltemal verskillend op verskillende aktiewe bestanddele reageer. Sonder registrasiewerk is dit baie moeilik om aanbevelings te maak sonder dat boere die produkte op eie risiko toets.
Nuttige wenke oor die vestiging en optimale benutting van aangeplante weiding is deur kenners verskaf op ’n Brasuda-boeredag wat buite Potchefstroom gehou is. Van die inligting oor die jongste weidingsgewasse kan veeboere help om hulself te staal vir ’n volgende droogte.
Benewens kenners van dié saadmaatskappy, onder andere dr. Conrad Coetzer, direkteur, en mnr. Fanie le Roux, areabestuurder, het die ervare mnr. GD Prinsloo, sakebestuurder vir die weste by Laeveld Agrochem, voorleggings gedoen.
NOG WERK WAG
Prinsloo het gesê baie werk en registrasies is reeds oor bosindringerplante in natuurlike veldweiding gedoen. Dit is egter produkte wat spesifiek vir kruidagtige of houtagtige, meerjarige onkruide in gevestigde veld geregistreer is. “Daar moet dus met groot omsigtigheid en deeglike beplanning saam met kundiges gekyk word na die soort onkruidspesie wat in aangeplante weiding bestry moet word, asook die onttrekkingstydperk wat die aktiewe bestanddele vereis voordat
