In haar 1950’s-geïnspireerde voorskootjie en aanglipskoene lyk die flambojante, suksesvolle Australiese modeontwerper Alannah Hill die ene glansryke voorstedelike huisvrou met ’n verskeidenheid vars tuisgebak wat pas uit die oond gekom het en ’n vuurtjie wat knetter in die kaggel. Maar moenie dat dié suikerlagie jou ’n rat voor die oë draai nie, want Alannah speel sommer net huis-huis.
