Die eerste bok, ’n blouwildebees, het veels te ver vir die 8x57 JS Mauser van my pa gestaan. Ek was die skut. Die tweede keer – en dié keer was dit ’n vark – het hy weer te naby gestaan. Dit was weer met die Mauser, en dit was die eerste middag van die jagprys wat ek by SA JAGTER/HUNTER-tydskrif gewen het en wat deur Mynhard Herholdt van die Noord-Kaapse Beroepsjagskool by Vanderkloofdam geskenk is.
“Dit gaan ’n lang paar dae word...” het dit droogweg van die manne agter op die Cruiser gekom. “Ja-nee, bokkoors speel nie met ’n man nie. Dis amper erger as Covid, want jy weet nie eens altyd dat jy dit het nie,” het iemand anders ewe lakoniek bygevoeg. Kotie, die een “PH”, het maar net droogweg geglim-lag. Ek het nogal gewonder wat hy so stilweg gedink (gevrees?) het. Daarby moet ek sê ek het lanklaas so kalm en rustig oor die twee skote gevoel – of het ek?
Laat ek voor begin. Nadat ek die goeie nuus gekry het oor die wonderlike jagprys wat drie stuks wild (’n
