Ná die suksesvolle aanbieding van die grootste kompetisie van sy soort in 2022, is die SAJWV en SA JAGTER/HUNTER se 2023-Buffeljagkompetisie met groot afwagting geloods. Die wenner, Henk Becker (’n lid van die SAJWV se Tembo-tak), was die gelukkige persoon wie se naam deur onafhanklike ouditeure en onder toesig van die NLC (Nasionale Loterykommissie) se personeel op 8 November 2023 getrek is. Henk het sy vriend Grant Anderson saamgenooi. Beide van hulle is ervare skuts: Henk is ’n toppresteerder by die vereniging se nasionale kampioenskappe en Grant het al Suid-Afrika op Protea-vlak verteenwoordig – die manne mag maar skiet!
Op 23 November 2023, ná ’n lekker ontbyt by O.R. Tambolughawe, het Henk, Grant, die SAJWV se president, Basie Bergh, en ek Beira toe gevlieg waar die span van Zambeze Delta Safaris se helikopter reg gestaan het vir die sowat uur lange vlug na hulle kampe in die Coutada 11-jagkonsessie waar hulle reeds sedert 1992 safari’s aanbied. Die vlug oor die Zambezi-delta is iets besonders wat mens net werklik kan waardeer as jy dit self sien. Die Coutada 11-konsessie bestaan uit vyf verskillende habitatte – Miombowoud, sand-woud, tropiese savanne, die vloedvlakte en die moeras. Elke habitat is die tuiste van die vele verskillende spesies wild wat daar voorkom – 21 jagbare spesies. Die troppe en troppe diere wat ’n mens uit die lug kan sien is te danke aan die puik bestuur en teenstropingswerk wat hulle doen (sien ook “Snelvuur” in hierdie uitgawe).
Die ontvangs by die vliegveld was kenmerkend van die ZDS-span – vriendelike glimlagte, personeel wat jou tasse versorg en ’n heerlike koue glasie vrugtesap vir lafenis teen die hitte-golf wat die gebied getref het. Ons het tuisgegaan in die Ngazikamp wat in die 1960’s deur Portugese jagters gebou is en onlangs deur ZDS opgeknap is. Dit is ZDS se “klein” kamp wat sowat vier jagters kan huisves, kompleet met lugversorging in die rondawels – meer oor die hitte later!
Nadat ons afgepak het,