SEDERT sy naam sinoniem met skande geraak het, sit die hertog van York sy dae om by die huis en kyk die een TV-reeks ná die ander. Die kans is dus goed dat hy al iewers die voorprent sou gesien het van ’n fliek met die bondige titel Prince Andrew: Banished.
Die dokumentêre rolprent deur die Amerikaanse netwerk NBC is in Oktober verlede jaar uitgereik, minder as ’n maand ná die dood van koningin Elizabeth II. In die fliek verwys een van die kenners met wie onderhoude gevoer word na Andrew as die “swakste varkie” van die Windsor-werpsel. Elders in dié rolprent van 80 minute word die een nare byvoeglike naamwoord ná die ander vir die prins gebruik. Hy word onder meer “pateties”, “narsisties”, “bedorwe”, “hoogheilig” en “ ’n idioot” genoem.
Daar word nie doekies omgedraai nie – die vervaardigers beskryf die dokkie as die storie van “hoe prins Andrew se skandale en sy vriendskap met die seksmisdadiger Jeffrey Epstein deur arrogansie en wellus byna die Britse monargie gesink het”. Dié haat vir koningin Elizabeth se tweede seun is ook oral in die regte wêreld te sien. Toe hy verlede jaar met die Royal Mile in Edinburgh agter sy ma se kis gestap het, het omstanders hom letterlik uitgejou. Dis duidelik enige simpatie wat iemand dalk nog-onderhoud drie jaar gelede uitgesaai is, het so te sê opgedroog.