SUIDOOSTER SAAM MET RUTH
DIE woorde “Voorheen op Suidooster” het maar pas op die skerm verskyn. Maar in haar gewone stoel, met ’n gehekelde kombers oor haar skoot om die winterkoue se tande te trek, sit ’n bejaarde vrou oorgehaal vir haar jongste porsie lief en leed.
Ontmoet die 86-jarige Ruth Hendricks, onder die mense van Bishop Lavis as Ouma Ruth bekend. Maar deesdae is sy ver buite die grense van haar gemeenskap bekend. Hoekom? Want dié superaanhanger van die kykNET-sepie se kwinkslae oor die karakters se doen en late laat die land skater.
“Ek sit net hier, reg voor die TV, ” vertel sy oor die sepieafspraak wat sy nooit misloop nie. En vandag saam.
