Audrey Jantjies
Skrywer en projekbestuurder
Met haar lasergesnyde “Jantjies Klimeid”-oorbelle is Audrey, ’n jare lange inwoner van Railton, nie op haar bek – óf pen – geval nie. (En as die een haar dalk in die steek laat, vat die ander een dadelik oor.) Al ry sy deesdae gereeld rond vir haar werk as projekbestuurder by die ingenieursmaatskappy Delta, bly skryf haar eerste liefde.
Sy is in ’n “armste-van-die-armes-tweevertrekhuisie” op die buurdorpie Suurbraak gebore, en dié komplekse grootwordjare en haar lewe tans bly steeds ’n vername voedingsbron vir haar skryfwerk en haar blog! Xairu Queen, wat sy aanvanklik net in Engels geskryf het.
Maar toe ontdek Audrey die moontlikhede van Afrikaans, haar moedertaal, by ’n skryfkursus wat die veelbekroonde romansier Ingrid Winterbach in 2019 by die Swellendam-winterskool aangebied het. Verlede jaar is sy gekeur vir die mentorskapprogram van die Jakes Gerwel-stigting, plus ’n verhaal van haar het die US Woordfees se kortverhaalbundel gehaal. En nou is haar debuutroman, As die katjiepiering blom, vir publikasie aanvaar. Dié komvandaanstorie van Lea Floris speel eweneens in die Overberg en Kaapstad af. (“Ek het ook ’n paar jaar in Kaap gewoon, in Seepunt, maar in die jare van die Nigerian invasion,” sê sy.)
“Ek skryf oor hierdie plek, want my lê hier. As ek ná ’n werkstrippie terugry, dink ek elke keer daar is nie mooier dorpe as Swellendam en Suurbraak nie.
