KUBERKERSFEES:

1. SUID-AFRIKA

Samesyn, familie, vriende, lekker kos, liefde, omgee en veral nou dankbaarheid – dis Kersfees vir my. Ek het al baie mense verloor, ook my man, Robert. Ek is baie dankbaar vir my skoonfamilie aan wie ek baie naby is en ook ander familie en goeie vriende, dus dankbaar dat ek nie alleen is nie.

Die afgelope twintig jaar vier ek Kersfees in Pretoria of op my ma se plaas. Vanjaar gaan ek saam met familie en vriende in Buffelsbaai wees – ek sien só uit! Ek dink daar gaan beslis vis op die spyskaart wees.

Ek onthou veral die laaste Kersfees wat ek saam met my ma en Robert kon hê. Ons het besluit ons gaan nie werk nie, en dus was daar tonne goeie Suid-Afrikaanse kaas en ander lekkernye wat vooraf gemaak is. Ons kon net aanhou smul.

Kersfees as ’n kind was van my gelukkigste tye ooit. My ma het net geweet hoe om kinderharte gelukkig te maak en dit was altyd spesiaal.