TE KIES EN TE KLEUR
‘Ek het ’n sagte plek vir ou huise en hope kleur. Ek word deur my omgewing geïnspireer, veral die natuur, en wanneer ek góéd voel, vloei my kreatiwiteit behoorlik.’
Ella Vlug beskryf haar styl as eklekties, maar in haar lieflike reënbooghuis wat uit die 1920’s dateer, is dit eintlik die boheemse voorkoms wat die toon aangee. Hier kombineer Ella graag vintage-items met geborduurde materiale in helder skakerings en patrone en kikker dit dan verder op met mure en tapyte in ewe waagmoedige kleure.
Die gesin het eers in ’n ander huis, net ’n ent ondertoe in dieselfde straat in Zaandam in die noorde van Nederland, gewoon, maar die plek mettertyd ontgroei.
