Dit het alles begin met ’n langpadreis – ja, ’n goeie ou road trip – meer as twintig jaar gelede. Twee kreatiewe geeste wat saam die lewenspad stap, het in Tamboerskloof, Kaapstad, hulle geel drieliter-Ford Cortina met die naam “Die Piesang” gepak en koers gekies. N1 noordwaarts, rigting Karoo.
Cobus van Bosch was destyds nog ’n voltydse kunsjoernalis by Die Burger, en Madeleine Barnard die interne-kommunikasiebeampte by Old Mutual – nadat sy voor dit drie jaar lank publisiteitsbeampte was by Kunstekaap se dramadepartement. Twee joernaliste en vrye geeste in die vinnige baan van die stad.
En hier sit hulle vandag op Prins Albert. Twee kunstenaars, albei nou volledig vryskut, en gryser en wyser. En hulle werk en werskaf te lekker op hulle plasie van 1 000 m2 in Meiringstraat. Salig gelukkig saam met hulle drie katte, Nols, Milly (wat Mielie geword het) en Snoek. Cobus is ’n gerekende kunstenaar wie se olieverfskilderye na klënte reg oor die wêreld versend word, en die maker