Hartskos vir ma
OP Klein Roosboom buite Durbanville naby Kaapstad kan jy jou nou Sondae aan nostalgiese hartskos in ’n nuwerwetse styl verlustig. Dié plaas het bekend geraak vir hul MCC-vonkelwyne wat die energieke boervrou Karin de Villiers in 2007 begin maak het. Piti Coetzee is deesdae die wynmaker.
Nadat Karin se man, Jéan, in 2017 oorlede is, het die familie verlede jaar ’n eetplek oopgemaak en dit na hom genoem. Gaste het ’n mooi uitsig op die wingerde waar dié boer soveel van sy tyd deurgebring het.
Die sjef, Lorianne Heyns, hou van egte kos sonder te veel tierlantyntjies maar propvol geur. Hier is ’n paar van haar resepte – maak dit gerus vir jou ma.
BO-KAAPSE GEROOSTERDE VARKBLAD MET PIEKELPERSKES
Dis die tuisgemengde kerriepoeier wat dié varkblad tot hemelse lekkerte verhef.
GENOEG VIR 8-10 MENSE
BEREIDING: 15 MIN.
GAARMAAK: 8 UUR 20 MIN.
RUS: 25 MIN.
◗ 2,5-3 kg varkblad met been, behou swoerd◗ olie◗ 30 ml (2 e) seesout◗ 125 ml (½ k) Bo-Kaapse◗ kerriepoeier (sien resep)◗ 2 uie, geskil en in skywe gesny◗ 2 appels, in 1 cm-skywe gesny◗ 500 ml (2 k) hoenderaftreksel◗ 500 ml (2 k) droë witwyn of ekstra hoenderaftreksel◗ 500 ml (2 k) water
