ONS VERDRINK IN PLASTIEK!
Plastiek, kan ’n mens sonder skroom verklaar, het ons lewe verander soos min ander uitvindsels. En hier is die verrassing: Dit het ons lewe ten goede verander, die aarde ’n beter plek gemaak.
Wat, wonder jy waarskynlik: Het Platteland nou die kluts kwytgeraak!?
Kyk gerus om jou. Oral om ons sien jy dit, in volkome onskadelike vorm – van rekenaars en selfone tot elektriese toebehore. Dis in speelgoed, juweliersware, lampe, pothandvatsels, Teflon, isoleermiddel vir elektriese kabels, inspuitings. Skoene en klere, tandeflos, broekrekke, sykouse, lugsakke, motorsitplekke, broeikaste, tuinslange. Die pofbaadjies wat so hoogmode is. Ook in voertuie en vliegtuie, wat dié vervoermiddels ligter op brandstof maak en minder besoedeling tot gevolg het. En dan praat ons nie eens van die medisynebedryf nie.
’n Lewe sonder plastiek is haas ondenkbaar.
“Plastiek is oral en word in vele dinge gebruik,” beaam Lorren de Kock en Zaynab Sadan, die “plastiekspan” van die Wêreldnatuurfonds (WWF). “Dit is ’n baie bekostigbare en veelsydige materiaal wat die rakleeftyd van kos verleng. Dit is liggewig, duursaam en noodsaaklik in die medisynebedryf. Maar dit is die weggooikultuur wat tot die begrip ‘enkelgebruik’ gelei het – en dít is hoekom ons soveel daarvan in ons natuurlike omgewing sien.
