這个景色可能看起來敢若是幻影，毋過伊其實是 tī 冰島。這个叫做 Gatklettur ê 石拱門，是 tī 冰島西北爿 ê 海岸。前景有一寡仔較大粒 ê 岩石，差不多嘛有一公尺大。岩石下底 ê 雺霧，其實是海湧經過長時間感光了後 ê 平均運動。這張 是 kā 舊年 11 月彼陣，用仝一台 kha-mé-lah、踮仝一个地點、佇仝一暗 翕--ê 幾若張前景 kah 背景相片組合起來 ê 影像。會揀這个地點是因為前景媠甲親像是一幅圖。會揀這个時間是因為背景多彩 ê 極光。這个 tī 石拱門天頂 ê 捲螺仔極光，是天文攝影師 這世人看過上光 ê 極光。是講，極光波 tī 這个冷吱吱 ê 暗暝咧 跳舞，已經跳幾若點鐘久矣。按呢這个捲踅 ê 圖樣會隨無去。遙遠 ê 天頂有足濟天星。地球那咧自轉，這寡天星就 那踅 北極星 附近 ê 天球北極咧行。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230111/ 影像：Stefano Pellegrini 音樂：P!SCO - 鼎鼎 聲優：草莓大福 翻譯：An-Li Tsai (NCU) 原文：https://apod.nasa.gov/apod/ap230111.html Powered by Firstory Hosting