Dinotlelo tša Gauta

By Andrew Maroga

Ge Lucas a sena go kwa ka tahlegelo ya mosadi yoo a bego a mo rata bjalo ka mmagwe, o tšea leeto la go leba New Castle go yo hlatha setopo. Ge ba fihla New Castle le Mokgalabje le mootledi yo a bego a thwetšwe ba gahlana le mathata a go sahlelwa. Lucas o phologa tshahlelo yeo. Mokgalabje o gobatšwa o šoro moo tiragalo yeo. Ge Lucas a tsena bookelong go tlo hlatha setopo, o ikhweletša Lerato la pelo ya gagwe. Regina o ratana le Lucas morago o a timela. Mokgalabje o a hlokofala gomme Lucas o bowa gae. O gahlana le batho ba le ba go mo sahlela kua New Castle. O a swarwa. Gomme nnete e tšwelela molaleng. O a lokollwa. Ditsotsi tšela di a swarwa ka lebaka la tshedimošo ya gagwe. O fiwa mošomo ka lefapeng la sephodisa.

• Language: Pedi
• Publisher: Andrew Maroga
• Release date: Sep 26, 2022
• ISBN: 9781005619763

Andrew Maroga

Andrew Maroga o belegwe le go golela lefaseng la Driekop go la Burgersfort . O phethile dithuto tša gagwe Sekolong seo se Phagameng sa Mmiditsi. O ithutile tša bongwadi ka tlase ga tlhokomela ya mohu JR Maibelo. O ngwadile dipuku tše lesome-tshela tša Sepedi le tše pedi tša Seisimane. Ka ye nako ke moetapele wa dipolotiki ka tlase ga mokgatlo wa DA fao a bilego nkgetheleng ka dikgetho tša 2021. Ke moetapele wa lekala mo sekgaong sa gabo.

Book preview

Segopotšo

Ka puku ye ke gopola mmago bana ba ka Lilly Mankaba Maroga yo a ilego a mpelegela mafahlana ge ke be ke le gare ke ngwala puku ye. Ke re go yena, ‘ ke a leboga mmago rena, o tloga o le bohlokwa mo bophelong bja ka.’ Ka bo madimabe Modimo o ile a mo gopola pele puku ye e phatlalala. Aa moya wa gagwe o robale ka khutšo.

Ditebogo

Go Letty Mosadi Maroga, yoo e le go mma wa ka. Ke re go yena, ‘ke a leboga, mme motswadi, ge o ile wa nkgodiša ka lerato le botho bja botswadi.’ Ke gopola ge ke aloga o ile wa ntemoša gore ga se ke fetše tša bonna bja ka. Ke sa hlaelela thuto. Lehono ke nna yo ke iitia sefega ka tlhahlo ya gago. O gole o gole, Lengana la megokgo. Modimo a mpolokele wene.’

Boima bja go ruta

Ke be ke sena kgetho fela go ruta bana gore ba be le bokgoni bjoo ba bego ba bohloka e bile ba bo nyaka. Ke ile ka lemoga boima bja go ruta bana ka ntle le tlhahlo le bokgoni bjoo bo tseneletšego. Ka gona, ke ile ka re ka mo gare ga pelo ya ka ‘ ge e ba Modimo ga se a ka a go fa mpho ya go phetha mošomo wo o itšego, ga go seo o ka se fihlelelago. Go sa kgathalale gore o gapeletša bjang.

Ngwana wa mathomo, ebile e le wa leitšibulo, yoo ke bego ke swanetše go mo ruta e be e le Bongani. Mošemane wa mengwaga ye seswai. Yena o be a na le tlhaelelo ya kgopolo yeo e tseneletšego. Go lebala, go hlakahlakanya mangwalo, go hlola seo mantšu a se šupago, kotsi mo kgauswi le yena le go rarolla mathata ao a lebanego le wona e be e le tše dingwe tša tšeo di bego di mo tshwenya mo kgopolong ya gagwe.

Ka lebaka la go hloka boitemogelo bjalo ka ge ke šetše ke hlalošitše, ke ile ka hloka leano la maleba la go ka lokolla kgopolo ya ngwana yo gore le yena e be yoo a ka kgonago go fediša mathata a mo kgopolong ya gagwe.

Ke ile ka hlaloša kanegelo ge ke sena ke e bala, ke le gare ke hlaloša mantšu ao a bego a ka ba a boima. Ke be gape ke mmotšha ka fao a hlamegilego ka gona. Kudu ao ke bego ke lemoga gore a boima go yena go ka a gakologela. Kanegelo yeo ke bego ke e bala e be e bitšwa, ‘Letšatši la matswalo.’

Ke ile ka kgopela mošemane yoo gore a ntatele ge ke bala kanegelo yeo. O ile a dumela. Ka morago ga fao ke ile ka mo leka go bona ge e ba seo ke be go ke se bjala se tloga se wetše mobung wa nnete.

Ke ile ka mo kgopela gore a bale a le tee e le ge ke nyaka go bona gore o tloga a kwešišitše seo ke mo fahlollago ka sona. Mantšu a mathomo a boima mo go yena e bile, Tseba, hema, a latelwa ke fase, ge ke hlaola mantšu a se a ma kae. Ke ile ka leka go theoša lentšu la ka ge ke bitša mantšu ao gore a kgone go a swara ka mogopolo wa gagwe woo o monyane wa go sa kgone go itshwarela bonolo.

Ka morago ga go mo thuša ka mantšu ao ke ile ka šala ke ahlame ke sa tsebe gore ke dire eng goba ke tšee eng ke beye. Re be re kitimiša moya woo ka nnete re ka se tsogego re o swere. Puku yeo re bego re e bala e be e se ya mošemane yoo. E be e le ya moithuti yo mongwe yoo ke sa tlilego go šogana le yena. Ge ke sena go gakologela seo ke ile ka šala ke opša ke hlogo ke tloga ke gakanegile ke sa tsebe gore ke dire eng. Fela ka lebaka la gore ke be ke šogana le mpuwa; ke ile ka swanelwa ke gore ke itšhware ke se ke ka lahlegelwa ke taolo ya maitshwaro.

Ke ka lebaka la eng o re tlogela re šoma ka puku ye o dutše o tseba gore ga se ya gago? Ke ile ka botšiša mošemane yoo.

O ile a nkaraba le ge e le gore ke be ke sa tshepe gore seo a bego a se bolela e be e le nnete. O ile a mpotša gore puku yeo e šomišwa ka mphatong o tee le wa gagwe fela ga e balwe ke yena.

O nyaka go mpotša gore lebala dipuku tše di fapanego ka gare ga phapoši e tee ka gare ga meago e tee ya sekolo? Ke ile ka botšiša mošemane yoo ke gakanegetše go ya pele. Ka nako ya rena ge re sa ya sekolong, ka nako ya mmušo wa kgathelelo, seo e be e tloga e le seo se bego se sa kgonagale. Re be re ka se bale dipuku tša go fapana ka gare ga phapoši ye tee. Ge fela e se dithuto tšeo di fapanego.

Ke be bjalo ke tseba gore puku yeo ke ya morutwana yoo a sa tlilego go feta mo diatleng tša ka yoo a bego a le mphathong o tee le mošemane yoo.

Leo ebile lebaka leo le ilego la se se selaganye mo kgopolong ya ka ge ke bona leina la ngwana yoo wa ngwanenyana ka montle ga puku.

Ee, Mošemane yoo o ile a nkaraba a bontšha go lapišwa ke dipotšišo tša ka tša go se fele le go lapiša.

Bjalo, ke be ke tla dira eng ntle le go amogela.

Ka gona ke ile ka tswalela molomo wa ka wo mokoto ka thoma go ipotšiša ka mo pelong. " Ke ka lebaka la eng bana bao ba tsenago ka gare ga phapoši e tee, ba dira dithuto tša go swana, ka sekolong se se tee? Le ge e le gore go be go nyakega gore e be tšeo di fapanago, ke ka lebaka la eng e le thuto e tee? Ke be ke tloga ke sa kwešiše.

Ka gona ke ile ka fetša ka gore ke lona lenanego le leswa la thuto leo ke kwelego mašabašaba a batho a bolela ka lona. Ke be sa le tsebe. Ka gona, ge e ba ke nnete ke lona, gona ke tloga ke le nyenyefatša. Le tloga le hloka maikarabelo. Re ile ra tšwela pele le puku yeo go fihlela mafelelong.

Ge ke sena go ruta mošemane yola ke ile ka fetola mawa. Mošomo wa go ruta ke ile ka o fetošetša go morutwana wa ka wa ngwanenyana. Ke ile ka tsena go dipalo. Ka lebaka la gore mosetsana go fo itshwanela le mošemane o be a sa napa a hlahlamologile mo kgopolong, ke ile ka gapeletšega go bjala tsebo yeo e bego e lekane mabjoko a gagwe a manyane. Ke be ke tseba gore dipalo di tloga di thuša ge go tliwa mo tabeng tša go rarolla mathata. Ke ile ka mo ruta go hlakanya, go ntšha le go atiša ka tatelano.

Mathomong ke be ke ikwa ke hloya mošomo woo wa go ruta dipalo tše nyane tša go hloka mohola, fela ge letšatši le dutše le tshela kgomo mokokotlo, ke ile ka bona bohlokwa bja go phetha mošomo wo. Ke ile ka thoma go o thabela. Seo se ile sa dira lethabo la ka gore le golele godimo.

Nako ye nngwe le ye nngwe ge ke phetha mošomo woo o kghahlišago ke be ke lakatša gore batho ka moka ba tsebe. Le lehono ke be ke duma o ka re batho ba be ba bona seo ke se dirago. Le ka lona letšatši le ke