Seferong Sa Lehu

By Andrew Maroga

Ge Andries Molato a tsoga mesong ya mošupologo o ile a ikhwetša a lebagane le taba ye thata ya go lokiša mabone. O be a sa gopole gore letšatši la gagwe le ile go ba le thata ga kaalo. Go swarwa poo Ga borakgwebo ba Ethiopia le thuntšhwa ga ngwana go tlišetša Molato letšatši le boima. O gapeletšega go swara digongwana le go di bolaya. Go bolawa Ga KP le Boy le go gobatšwa ga Vmash go thoma go mo lwantšha le maphodisa. Naa o tla kgona go tšwa mo tabeng ye? Tše ka moka di hlalošwa ke puku ye Seferong sa Lehu.

• Language: Pedi
• Publisher: Andrew Maroga
• Release date: Mar 6, 2022
• ISBN: 9781005534165

Andrew Maroga

Andrew Maroga o belegwe le go golela lefaseng la Driekop go la Burgersfort . O phethile dithuto tša gagwe Sekolong seo se Phagameng sa Mmiditsi. O ithutile tša bongwadi ka tlase ga tlhokomela ya mohu JR Maibelo. O ngwadile dipuku tše lesome-tshela tša Sepedi le tše pedi tša Seisimane. Ka ye nako ke moetapele wa dipolotiki ka tlase ga mokgatlo wa DA fao a bilego nkgetheleng ka dikgetho tša 2021. Ke moetapele wa lekala mo sekgaong sa gabo.

Book preview

Ditaba tše dingwadilwego ka mo gare ga puku ye, ke tšeo di ile go tša direga. Maina le mafelo ke ao mongwadi a ikgopoletšego wona. Ka gona puku ga e šupe motho. E ngwaletšwe fela go ruta le go fahloša batho. Ipshineng ka go e bala le tlo iteboga. Mongwadi.

Ditebogo

Ga se ga kae, mo motho a ka kgonago go ngwala puku ya go swana le ye. Ke rata go leboga bana ba ka, Tshepisho le Lebogang Maroga le mmago bona yo a fetilego mo lefaseng la ka keno, e le go Lily Mahlakwana- Maroga. Batho ba, ba bapetše karolo e bohlokwa, ka go kwešiša bohlokwa bja go ngwala dipuku ga ka. Ba ile ba se mphelele pelo le go nkgadimola ge ke be ke le gare ke ba hlokiša nako ya bona mo go nna. Ba nthutile tše ntši tšeo malapa a mantši a di hlokago. Ke re go bona, le tloga le e hlabane bana ba tau. Ke leboga thekgo ya lena go menagane. Le ka moso ditau tše šo. Kgobadi ge e boka boka e botile morwadi.

Segopotšo

Ka pukwana ye ke gopola Mohumagadi Lawrencia Malete yo a ithobaletšego boroko bjo bogolo. Ke yena a mphilego thlohleletšo ya go feleletša puku ye morago ga go welwa ke manyami a go lahlegelwa ke mmago bana ba ka Lily Motlai Mahlakwana-Maroga. Ke re go yena ‘a moya wa gago o robale ka kgotso Nearadi.’ Le ge o sa bona dikenywa tša seo o se bjetšego fela ke dumela gore le fao o lego gona tše ka moka o a di bona. Ke sa re go wene ‘tseba gore la fata ga le bowe fela. Le bowa le šikere.’

I

E be e le mesong gomme re be re swanetše go ya dikantorong tšaMasepala wa Toropokgolo ya Tshwane go la Pitori ya kgale. Kgale toropo ye e be e bitšwa Pitori ka tlase ga mmušo wola wa kgethollo. Ge mmušo wo moswa wa batho ba ba baso o tsena e ile ya fetošetšwa go Tshwane. Lehono e bitšwa Toropokgolo ya Tshwane. Masepala wo ke o mongwe wa ye megolo ya mo nageng ya gabo rena ya Afrika Borwa. Dimasepala tše tše kgolo mo nageng ya ga bo rena ke tše seswai. Ke Tshwane, Mangaung, Cape town, Ethekwini, Ikurhuleni, Nelson Mandela Bay, Johannesburg le Buffallo City. Dimasepala tše di bitšwa ‘diMetro’ go ya le ka polelo ya le adingwa ya seisimane go ya le ka bogolo bja yona.

Dimasepala tše di šoma ka mokgwa wo. Go sa swane le tša Selegae le tša dilete, tšona di na le malekgotla a tee fao bomalekgotla ka moka ba kopanago ba swara dingangišano tša go aga dimasepala tša bona ba eteletšwe pele ke Molekgotla mogolo wa teropo yoo a bitšwago Meyara. Yena o kgethwa ke bomalekgotla bao ba kgethilwego ke setšhaba go ya le ka mekgatlo yeo ba e ratago mo dikarolong tša mafelo a bona tšeo di bitšwago ‘diWard’. Meyara yo goba molekgotla mogolo yoo o thušwa ke modulasetulo wa Masepala e le go Mosepikara yoo a kgethwago gape ke Malekgotla a. Yena mošomo wa gagwe ke go tsamaiša le go etelela pele dikopano tša lekgotla e le go Kansele. Ka boripana dimasepala tše di bitšwa gore di ikeme di le tee. Go ra gore ga di na tšeo di ithekgilego ka tšona go sa swane le tša dilete.

Ke ile ka tsoga bjalo ka mehleng, ka hlapa morago ga go ruthetša meetse ka kgase ka ge re be re sena mohlagase. Sefehlamohlagase sa rena se be se kgakgathile matšatši a mabedi ao a fetilego. Gomme re be re se begile gona kua masepaleng ka lekaleng la ba tša mehlagase fela go be go sena tšwelopele. Ba ga masepala ba be ba goga maoto, kudu ge o ka se ba nweše senwamaphodi gore ba tle ba kgone go dira mošomo woo. O be o swanetše gore o ba rekele senwamaphodi gomme e be gona ge ba tla tla ba go lokišetša. Ai, naga ya ga bo rena e tloga e bodile e le ruri. Re tla reng, ke seo re ikgethetšego sona.

Ke rile go fetša go hlapa bjalo ka nanabela ke gata ka ditsetseilane e le ge ke lebile ka phapošing ya rena ya go robala. Ke be k eya go yo tšea diaparo tšeo ke tlo go di apara. Go nanabeleng ga ka ke be ke sa nyake go tsoša wa ka wa senepe sa lebotong yo ke mo tlogetšego a robetše ge ke tsoga. Gantšinyana mosadi yo wa ka o be a rata go tsoga msegare gape e be e le motho wa gore ge a robetše a se ke a tsošwa. O be a fela a re re mo fetiša ka ditoro tša dilotto. Ke be ke sa mo felele pelo ka