Nong Seakaladi

By Andrew Maroga

Se bone go akalala ga bo nong go wa fase ke ga yona. Lesole ge a thoma go nyatša Mna Moima o be a sa lemoge gore o itlišetša kgakanego ya go tlo nyatšega. O thoma go bulela Moima melato yeo e se go gona le go reka maphidisa. O fa motšhotšhisi, moahlodi le maphodisa ka go leka go ba tswalela mahlo gore ba se ke ba tseba nnete. Fela tšeo ka moka di fetoga lefela ge a le gare a lahlegelwa ke tšhelete. Ka morago ga go lemoga gore maitekelo a gagwe a go leka go weša Moima ga se a mo šomela, o thoma go leka go lefiša maphodisa. Moima o a bitšwa go tla go tima mollo woo. Lesole o hlala mosadi, o a tšhaba ka lebaka la gore o tlile go segiwa. Ka nnete Sepedi se boletše ge se re se bone go akalala ga bo nong go wa fase ke ga yona.

• Language: Pedi
• Publisher: Andrew Maroga
• Release date: Dec 22, 2022
• ISBN: 9780463733554

Andrew Maroga

Andrew Maroga o belegwe le go golela lefaseng la Driekop go la Burgersfort . O phethile dithuto tša gagwe Sekolong seo se Phagameng sa Mmiditsi. O ithutile tša bongwadi ka tlase ga tlhokomela ya mohu JR Maibelo. O ngwadile dipuku tše lesome-tshela tša Sepedi le tše pedi tša Seisimane. Ka ye nako ke moetapele wa dipolotiki ka tlase ga mokgatlo wa DA fao a bilego nkgetheleng ka dikgetho tša 2021. Ke moetapele wa lekala mo sekgaong sa gabo.

Book preview

Ditebogo

Ka puku ye ke leboga mang le mang yoo a kgathilego tema mo bongwading bja ka. Ke sa lebale le sehlopha sa Via Afrika seo se ilego sa nthuta tše ntši ge go tliwa mo ditabeng tše tša bongwadi. Kudu Mrs Mkalipi yoo a go se mphelele pelo ge ke be ke šaetša ge ba e be ba mpha mešomo ya gae ka nako yeo ke bego ke hlahlwa ka tše tša bongwadi le bophatlaladi. Ke re go bona ke a leboga bana ba kgoši. Kgoši ke kgoši ka setšhaba. Le ka mso.

Segopotšo

Puku ye ke segopotšo go Mohu Noko Linah Moloi yoo lehu la gagwe le ilego la nkeletša gore bophelo ke bjo bo kopana gomme motho o gapeletšega go dira seo Modimo a mo tlišeditšego sona mo lefaseng e sa le ka pela. Ke re go yena, ‘a moya wa gagwe o robale ka khutšo.’

Temošo

Puku ye e ngwadilwe fela go lemoša le go hlahla. Maina le mafelo ao a šomišitšwego ka mo gare ga puku ye ke ao mongwadi a ikgopoletšego wona. Le ge mmadi a ka tseba beng ba maina ao o swanetše go kwešiša gore ga a šupe bona. A šomišitšwe fela go beakanya puku ye.

Karolo ya pele

Bophelo bo nthutile le ge e le gore dirutegi di ka fo fela di gana gore yeo bophelo bo mphelego yona ga se thuto ya maemo. Ga ke na kgerata ya Univesiti goba diploma ya kholetšhe, le ge e le setifikarata sa sekolo se se phagamego. Fela ge e le mabadi a lehloyo le lenyatšo tšona di hlatsela seo ke se bitšago thuto ka gore polelo e re bohlale bo tšwa lebading. Ge o ka be o ka bona seo se le go mo pelong ya ka o be o tla lemoga bohlatse bja seo ke se bolelago. Bjalo ka gore bo ka teng bja motho ga bo swane le bja phoofolo fao o ka fo e bolayago wa bona wa bona seo se le go ka mo gare ga pelo.

Le ge go le bjalo ga gona taba gobane bohloko bjona bo kwa ke mong wa bjona. Go kwa ga go kwelanwe. Ke tla fo amogela le ge e le gore ga go amogelege. O ka fo makala gore ke mang le gona ke ka lebaka la eng ke bolela bjalo. Ka leina ke Raymond Moima. Ge ba ntheta ba re ke Sphakamonwana, ke Senganga sa Bopedi. Fela nna ke ipitša sehlola baloi. Ga ke dumele gore go na le moloi yo a ka nkatago ge e ba ka nnete baloi ba gona. O amogetšwe mo bophelong bja Rei, lesogana la go inyatša fela le le boima. O se ke wa lebala gore ke nna Moima, ke a imela.

Phathanya ke sethuba malapa ge fela o sa e bona. Ge ke tsoga mesong ya letšatši la botate ke ngwaga wa 2018 ke be le nna ke ikemešeditše go tlo le keteka le molekane wa ka ka lethabo le mafolofolo ao a makatšago. Ke be ke lebeletše tša bosa mo telebešeneng gomme ke bone gore ga go tlo ba le leru leo le ka go ntšhitiša go keteka. Ke be ke ikemišeditše go keteka le mokgekolwana wa ka yoo ke bego ke mo rata ka pelo le moya.

Ke ile ka tsošwa ke go kwa go lla digarafo mo hekeng ya ka. Ke ile ka tsoga gobona gore go diragalang. Nnete batho ba be ba le gare ba aga leboto mo pele ga heke ya ka. E be e le banna ba babedi. Yo mongwe o be a duba leraga la samente mola yo mongwe a e be a le gare a aga leboto ka ditena tše dinyane. Ditena tšeo e be e le tša moagišane wa ka yoo a bego a tsebja ka la Nong le ge e le gore e be e se leina la gagwe. E be e le la dikwero ka gore o be a rata maemo. O be a sa le kwešiše leina leo ka ge e be e se mopedi. Batho ba be ba mmitša gore ke Nong ka lebaka la seema se, ‘Se bone go akalala ga bo nong go wa fase ke ga yona’. Ka gona o be a akaletše. A le nong seakaladi.

Nong yoo o be a ipitša lesole ka ge a be a šoma kua masoleng ka Thabatshwane. Nako ye ka moka o be a itsebiša mo go batho ba tikologo ka la Lesole gomme a itiretše leina ka wona mokgwa woo. Batho ba be ba mo tšhaba le go mo hlompha mola yena a ba swara bjalo ka matlakala le go ba tšhošetša gohle mo a gahlanago le bona.

Nna ke be ke sena taba le yena. Go nna o be a le motho bjalo ka mang le mang. Ke dumela gore seo ke seo se ile go sa dira gore nna le yena re be katse le legotlo. Goba e be e fo ba ntwa ya baagišane, ga go yo a tsebago. Fela nna ke be ke mo hloile. Ke be ke sa hloya yena go bolela nnete, eupša ke be ke hloile mekgwa ya gagwe. Motho ga re mo hloye, re hloya seo a le go sona.

Ke ile ka tsoga ka fologa mpete, ka topa borokgo bja ka mola ke bo lahletšego maabane ge ke be ke gopotše wa lerato la ka pele ke kakatlelwa ke boroko. Ke ile ka bo apara ka leba kua ntle. Ke ile ka bula lebati ka ba leba thwii. Ke be ke sentše sefahlego fao le ngwana