Malefane

By Andrew Maroga

Mogoroga o kopana le bothata bjo a sa ka go a bo bona mo bophelong bja gagwe. Monna wa Lesotho yo a thutšwego ke terene o nale dikgwedi tše pedi a sa bolokwa ka go hloka tšhelete. Mogoroga o kgopelwa go re a thuše ka ga go blokiwa ga motho yo. O swanelwa ke go nyaka tšhelete ya go boloka motho yoo. Ge a le ga re a nyakana le thušo ya mašeleng o gahlana le taba ya gore Malefane monna a Lesotho o robala le mohwana mogatša mohu. Ge a sa gakanegile gore taba ye bjalo e kgonega bjang o gahlana le ya gore lehung la mohu yo a thutšwego ke setimela mosadi wa gagwe ( Wa mohu) o nale seabe mo lehung la gagwe. O mo rapetše dira go re dimmolaye a tle a šale le Malefane e le go mogwera wa mohu. Mogoroga o ikhwetša a lebagane le thaba ya taba fao e le go gore o swanelwa ke go rarolla bothata bjo bja lehu ntle le thušo ya batho bao a thomilego le bona e le go mogatša mohu, yo a ilego a swarwa ge sephiri se sena se utologa, le Malefane yo a go iphihla, a iphihlela ba ga bo mohu ge ba etla go tšeya mohu wa bona go tšwa Lesotho . Bothata bjo bja lehu ga bja palela batho fela eupša le dikhanselara. Naa Mogoroga yena o tla kgona? A re hwetšeng tše ka moka ka mo gare ga puku ya rena ya Malefane.

• Language: Pedi
• Publisher: Andrew Maroga
• Release date: Jan 5, 2022
• ISBN: 9781005572761

Andrew Maroga

Andrew Maroga o belegwe le go golela lefaseng la Driekop go la Burgersfort . O phethile dithuto tša gagwe Sekolong seo se Phagameng sa Mmiditsi. O ithutile tša bongwadi ka tlase ga tlhokomela ya mohu JR Maibelo. O ngwadile dipuku tše lesome-tshela tša Sepedi le tše pedi tša Seisimane. Ka ye nako ke moetapele wa dipolotiki ka tlase ga mokgatlo wa DA fao a bilego nkgetheleng ka dikgetho tša 2021. Ke moetapele wa lekala mo sekgaong sa gabo.

Book preview

Puku ye e ngwadilwe ka sepedi efela e akareditše le maleme a mangwe a go swana le boSesotho sa Borwa le Seisimane. Ka gona ge mmadi ge a gahlane le polelo tše bjalo, a se ke a gakanega gomme a kgopele thušo go bao ba tsebago maleme ao.

Mongwadi.

Ditebogo

Ga se ga kae, mo motho a ka kgonago go ngwala puku ya go swana le ye. Ke rata go leboga bana ba ka, Tshepisho le Lebogang Maroga le mmago bona yo a fetilego mo lefaseng la ka keno, e le go Lily Mahlakwana- Maroga. Batho ba, ba bapetše karolo e bohlokwa, ka go kwešiša bohlokwa bja go ngwala dipuku ga ka. Ba ile ba se mphelele pelo le go nkgadimola ge ke be ke le gare ke ba hlokiša nako ya bona mo go nna. Ba nthutile tše ntši tšeo malapa a mantši a di hlokago. Ke re go bona, le tloga le e hlabane bana ba tau. Ke leboga thekgo ya lena go menagane. Le ka moso ditau tše šo. Kgobadi ge e boka boka e botile morwadi.

Segopotšo

Ka pukwana ye ke gopola Mohumagadi Lawrencia Malete yo a ithobaletšego boroko bjo bogolo. Ke yena a mphilego thlohleletšo ya go feleletša puku ye morago ga go welwa ke manyami a go lahlegelwa ke mmago bana ba ka Lily Motlai Mahlakwana-Maroga. Ke re go yena ‘a moya wa gago o robale ka kgotso Nearadi.’ Le ge o sa bona dikenywa tša seo o se bjetšego fela ke dumela gore le fao o lego gona tše ka moka o a di bona. Ke sa re go wene ‘tseba gore la fata ga le bowe fela. Le bowa le šikere.’

I

Morena Mogoroga, ke Tefelo Senamela fa,

Ee, Morena Senamela, le kae?

Re gona re ra lena,

Aowa Modimo o sa re babaletše,

Ee, ke taba tše botse tšeo.

Yoo ke Morena Senamela, bjalo ka ge ke tlwaetše go mmitša morena. Gabotse leina la gagwe ke Pule Senamela. Ke be ke šoma le yena mo go Mokgatlo wa rena wa dipolotiki woo o bitšwago Democratic Alliance le ge e le gore ga bjalo yena o hweditše setulo sa godingwana mola nna ke šetše kua tlasana.

Morena Mogoroga, ke go leleditše malebana le mošongwana wo mongwe woo ke nyakago gore o ntirele wona, O ile a tšwela pele le go bolela bjalo.

Hmm, mošongwana, ye! Ke wa eng woo?

Aye, ga se wa go tshwenya. Bjalo ka ge o tseba gore o šoma ka batho, ebile mo mokgatlong wa rena re tshepile wene, ke be ke kgopela gore o re thuše,

Ke le thuše? Ka eng bjalo? Ke ile ka botšiša ke gakanegile. Ke be ke mo kwa eupša ke sa mo kwešiše. Gape se sengwe seo se bego se dira gore ke se ke ka mo kwešiša ke gore, go bolela nnete, ke be ke sa nyake mošomo ka ge ke e be ke nyaka go khutša le go fodiša hlogo morago ga mošomo o boima woo ke tšwago go wona. Ke be ke sa tshepe gore nka tla ka kgona wo mongwe mošomo ka se sebaka.

Ee, go nale motho yoo a hlokofetšego kua Matlejoane. O nale kgwedi tše pedi a hlokofetše eupša ga se a bolokiwa. Batho ba gona ba re ga ba na tšhelete ya go mmoloka. Bjale ke be ke kgopela gore o re thuše, motho yoo a bolokiwe.

Eish, mmereko wo mongwe gape. Go bolela nnete ke be ke šetše ke thomile go lapa gobane dilo tše tša go thuša batho di be di njela nako le tšhelete. Ke be sa hlwe ke na le nako ya go ikgopodišiša le go gopola tša lapa la ka. Ka mo ke sa leka go itebatša mahloko ao ke be go ke etšwa go wona. Mahloko a gona ke gore ke hlokofaletšwe ke mosadi, le gona sekirileke ka fao go hlomolago pelo. Ga se a babja sebaka, o babjitše kgwedi tše dine ya ba o a hlokofala. Ke be ke sa nyaka nako ya go itekola gore go ka ba go diragetšeng. Bjalo ge mmereko o etla bjalo, ga ke tsebe gore ke tlo bona ke dirileng.

Bjale, o ka nkopantšha bjang le batho ba gabo motho yo a hlokofetšego gore ke kgone go bona gore ke dira bjang? Ke ile ka botšiša bjalo ke le gare ke elwa le dipelo. Go bolela nnete ke be ke sa nyake. Mara ka gore bophelo ke bophelo ke be ke tla reng.

Ee, ke nyaka go go fa dinomoro tša batho bao tša mogala. O ile a thoma go di bala gomme ka tšeya pene ka di ngwala fase. Ke ile ka mmalela tšona gape gore ke netefatše ge e ba ke tšona, ya ba o a dumela gore ke tšona. O ile a re ke bolele le mongwa dinomoro tšeo gomme motho yoo o tla nkopantšha le batho ba ga bo motho yoo a hlokofetšego. Go tloga fao o ile a bea mogala fase.

Ke ile ka ema gannyane ke sa tsebe gore ke dire eng. Go ya le ka nna ye e be se taba ye kgolo ga kaalo, ka ge ke e be ke tseba gore Masepala wa mo nageng ya rena o kgona go thuša batho bao ba ithlakelago ka go ba bolokela bahu ba bona ge ba palelwa. Sa go dubaganya kgopolo ya ka ke gore ke ka lebaka la eng motho yoo a dutše nako e telele bjalo a sa bolokiwa. Ke re ka gore nnete gona le Senamela o be a tseba fao a ka ya go go nyakela motho yoo thušo. Ke ile ka fela ke gakanegile le ge e le gore letswalo la ka le be le fela le mpotša gore go nale seo se diragalago felo fa sa go se ye ka tsela.

Ke ile ka ema ka tšea sellathekeng sa ka fao se bego se le gona ka kgotla dinomoro tšela Senamela a mphilego tšona gomme ka se hloma tsebeng. Se ile sa lla gararo ka thoko yela gomme ya ba lentšu la mosadi le tsena tsebeng ya ka.

Hallo, ke Mokgadi mo nka go thuša?

Hallo, ee, ke nna Mogoroga.

Mogoroga, ke go thuša ka eng?

Sa pele, a ke thome ka gore, dinomoro tša gago ke di filwe ke morena Senamela. Ke founa malebana le motho yoo ba re go o hlokofetše kua Matlejoana, Ke be ke sa nyake gore ke hlaloše gore ba re o nale kgwedi tše pedi a sa bolokiwa. Go ya le ka nna taba ye bjalo ke mabarebare. Go tloga mola e sa bolelago ke beng ke gore ke mabarebare.

Ee, motho o gona yoo a hlokofetšeng kua Matlejoane, o nale kgwedi tše pedi a sa bolokiwa. Bjalo ga ke tsebe gore wene o tla ya o kgona go thuša batho bao ka gore le khanselara ya rena e paletšwe. Ga ke na bonnete bja gore o tla ya o kgona.

Nnete ke nnete. Go re ke tla ya ke kgona gona ke be nka se mo fe seo e le go nnete. Kudu ge go paletšwe batho ba go swana le boKhanselara, nna ke selo mang?

Mosadi wa modimo ga ke tsebe gore ke reng. Nka se re ke ile go kgona goba go palelwa. Ke kgopela fela gore o nkopantšhe le batho bao ke bone gore ke kgona eng goba ke palelwa ke eng. Ke ile ka mo fetola bjalo. Go bolela nnete go tšhoga gona ke be ke sa tšhoga wo kaalo. Go tloga mola ke ilego ka rarolla mathata a go feta a, ke be ke sena le kgathelelo ya mogopolo le gatee. A, ga se mathata, ke mathatanyana. Ke rarolotše mathata e se go dilo tša go swana le tše.

Go lokile. A re kopaneng ka iri ya boselela kua kgauswi le mabitla. Ke tla ba leletša mogala ke ba tsebiše gomme re kopane fao.

Aowa ga ke bone phošo le gatee felo. Ke tla leka go fihla ka nako yeo. Go lokile. Morago ga gore le yena a re go lokile ke ile ka bea mogala fase. Ke ile ka lebelela sešupanako mo mogaleng ka hwetša e sa le metsotso e mehlano pele ga iri ya bobedi. Go ra gore ke be ke sa nale di iri tše tharo pele nka tla ka re ke ya