Sešampane sa mpulu

By Andrew Maroga

Andrew Maroga o belegwe ka ngwaga wa 1978-03-16 seleteng sa Burgersfort nageng ya Driekop go La ga Maroga lefase. O thomile dithuto tša gagwe ka ngwaga wa 1985 sekolong se se nyane seo se bitšwago Ntoshang lefaseng la ga Mahlokoane. Ka ngwaga wa 1991 o ile a phetha dithuto tša gagwe tša motheo.,ya ba o tshelela sekolong seo se phagamego seo se bitšwago Mashupše lefaseng la ga Phasha Mampuru. O ile a emiša dithuto tša gagwe ka morago ga go phetha mphato wa seswai, woo lehono o bitšwago Grade 10, ka morago ga bolwetši. Ka ngwaga wa 1997 o phethile mphato wa gagwe wa Marematlou ka naletšana e tee. Ka lebaka la bodiidi bja lapa la gabo o ile a palelwa ke go tšwela pele. Fela o ile a tšwetša pele tsebo ya gagwe ya bongwadi pele ka go ikopantšha le bangwadi ba go swana le bo mohu JR Maibelo. Lehono o ngwadile dipuku tše lesome tshela.

• Language: Pedi
• Publisher: Andrew Maroga
• Release date: Jan 2, 2024
• ISBN: 9798215087596

Andrew Maroga

Andrew Maroga o belegwe le go golela lefaseng la Driekop go la Burgersfort . O phethile dithuto tša gagwe Sekolong seo se Phagameng sa Mmiditsi. O ithutile tša bongwadi ka tlase ga tlhokomela ya mohu JR Maibelo. O ngwadile dipuku tše lesome-tshela tša Sepedi le tše pedi tša Seisimane. Ka ye nako ke moetapele wa dipolotiki ka tlase ga mokgatlo wa DA fao a bilego nkgetheleng ka dikgetho tša 2021. Ke moetapele wa lekala mo sekgaong sa gabo.

Book preview

Ditebogo

Ga se ga kae, mo motho a ka kgonago go ngwala puku ya go swana le ye. Ke rata go leboga bana ba ka, Tshepisho le Lebogang Maroga le mmago bona yo a fetilego mo lefaseng la ka keno, e le go Lily Mahlakwana- Maroga. Batho ba, ba bapetše karolo e bohlokwa, ka go kwešiša bohlokwa bja go ngwala dipuku ga ka. Ba ile ba se mphelele pelo, le go nkgadimola, ge ke be ke le gare ke ba hlokiša nako ya bona mo go nna. Ba nthutile tše ntši, tšeo malapa a mantši, a di hlokago. Ke re go bona, ‘le tloga le e hlabane bana ba tau.’ Ke leboga thekgo ya lena go menagane. Le ka moso ditau tše šo. Kgobadi ge e boka boka e botile morwadi.

Segopotšo

Puku ye ke segopotšo go mosadi wa ka, Lily Mahlakwana – Maroga, yo a ithobaletšego boroko bjo bogolo. Ka yona ke gopola gape Erita Maroga le Monicca Sesikana Maroga bao ba re šilego re sa le bana. Ke re go bona A meboya ya bona e robale ka khutšo. Ke re ba se re robalele fela, eupša ba re robalele le ditlhoka.

I

Ka ngwaga wa sekete makgolo senyane masome šupa seswai (1978), ke ge lefaseng go tlišwa serišane motho go hlokwa, lesogana la senganga, la go tielela, la go swana le nna. Ke be ke le motho wa go ikhomolela, le ge e le gore, ke be ke bontšha ke nale boradia fale le fale. Ke be ke se motho wa go lla kudu, ka fao go hlobaetšago, le ge e le gore, go lla gona ke be ke lla bjalo ka ngwana ofe goba ofe. Mma wa ka, e be e le Letty Mosadi Maroga, mola tate, e be e le Caiphus Makofane. Ke belegetšwe lefase la Driekop, ga Maroga, fao go bego go bitšwa 1129 pele bohlale bo aparela batho ba ga bo rena. Tate wa ka e be e le Caiphus Makofane. O be a šoma kua thokong tša borwa, le ge e le gore ke be ke be ke sa tsebe gore kae, ka lebaka la bonnyane.

O be a nale go re tlela le dijo, fao a bego a šoma gona. O be a itheketše sefatanaga, ka yeo nako difatanaga di be di rekwa ke bao ba bego ba ikgona, ba go ba le sa bona. Go ra gore fao a bego a šoma gona, o be a lebogwa ka moputso wa go lebelelega. Ka mo gae, le gona, re be re eja re lahla. Dilo di be di re sepelela gabotse. Re be re le bana ba bahlano ka palo, le ge e le gore o tee wa rena, o be a sa dule le rena. Yo mogolo mo go rena. O be a dula kua ga bo mmago rena, lefaseng la ga Phasha, ga Mampuru. Ga ke kgone go tseba gore ke ka lebaka la eng ge a be a swanetše go kgaogana le rena, a dula fao. Ke be nka se botšiše, ka ge ke be ke sa le ngwana.

Nka se tšwele pele ka go bolela ka yoo tate, Caiphus Makofane, ka ge ke ile ka tla ka gapeletšega go tlo mo tseba gape gore ke tate, ke na le mengwaga ye lesome senyane, ge ke sena ke phetha mphato wa ka wa Marematlou. Gore re arogane bjang le yena, ke ile fela ka botšwa gore tate o ile a tla le mosadi yo mongwe yoo lehono e le go mosadi wa gagwe. Seo ke se tsebago ke gore mosadi yoo o tlile le bana ba bararo ba tletše meno ka ganong. Seo ke seo se ilego sa dira gore ke arogane le, le go se tsebe gabotse, yoo tate.

Go tloga fao re ile ra yo dula lefaseng la ga Madiseng, ga kgoši Riba. Ga se ra dula sebaka sa go iša pelo mafiša ya ba mma o kopana le mokgalabje tsoko wa go etšwela kua nageng ya Malawi, wa ga Phiri. Leina la gagwe e be e le Joram Phiri. Yoo Joram Phiri, o be a šoma moepong wa go epa koromo, woo o bego o bitšwa Lennex, le lehono o sa bitšwa bjalo. Joram yoo, o be a nale bana, le ge e le gore ke be ke sa ba tsebe. Le ga tee, ga se ba ka ba tla go yena, go tloga mola re dulago le yena. Ke be ke fo kwa ba bolela ka bona.

Ga se ra dula sebaka fao ga Madiseng. Re ile ra tloga ra yo dula lefaseng la ga Maapea ka thoko tša bookelong bja Mandagshoek ya maloba. Bookelo bjoo lehono bo khudšeditšwe ka thoko tšela tša Driekop, fao ke belegetšwego gona. Ka yeo nako ge re khudugela ka fao ke be bjalo gona ke tšwile mahlalagading. Ke be ke nale mengwaga ye tshela. Ke be ke swanetše ke go yo thoma sekolo. Ga se ra dula le gona fao ya ba re hudugela naganyaneng ye nnyane yeo bego e bitšwa Digabane.

Ka bomadimabe, re rile ge re tloga fao, ra swelwa. Sesi wa ka, yoo a bego a bitšwa Sesikana, o ile tšhuma lehlokwa a nyaka selo tsoko, ke lebetše gore eng, gomme a le lahlela fao go bego go nale diaparo tšeo di bego di letile go tlo hlatswiwa. Re ile ra khuduga bohloko ka ge re ile ra swelwa ke tše dingwe tša diaparo tša rena. Ka yeo nako nna ke be ke thabile ka ge ke be ke tseba gore ke yo hwetša bagwera ba baswa.

Ge re fihla Digabane, re ile ra dula ka thokwana ya borwa bja thabana ye nnyane, yeo e bego e tsebjwa ka lona leina leo. Lefelo leo le be le na le matlapa a mantši ao a bego a ntshwiswatša pelo. Le be le sa bontšhe go ba lefelo leo batho ba ka dulago go lona. Go be gape go na le dinoga le magokolodi le mesethaphala, e le go dilo tšeo ke bego ke di hloile ka pelo ya ka ka moka. Fela re be re tlo dula fao re rata goba re sa rate, ge re nyaka go ba le ga ga bo rena. Re ile ra dula fao gomme ka morago ga matšatši a se a ma kae, ga ke tsebe gore a ma kae, ka ge ke be ke sa le ngwana ke sa tsebe go bala, re ile ra yo ngwadišwa sekolong se se nyane seo se bego se bitšwa Ntoshang Primary School lefaseng la ga Mahlokwane. E be e le kgole le fao