Poloko ye e makatšago

By Andrew Maroga

Ditaba di thoma ge Moilagae a tloga kerekeng yeo a bego a e tsena a leba lapeng la lehu. O ile a tloga le bagwera ba gagwe. Ge a fihla kua lapeng la lehu o ile a kgethwa go ba Motsamaiši wa modiro. O ile a dumela go sepetša modiro wo wa lehu. Ge bošegogare bo fihla o ile a kgopela program, yeo ba go mo fa yona. O ile a re ge a e bala a makatšwa ke go bona nthla ye nngwe go yona go ngwadilwe polelo ka MaIndia. O ile ge a botšiša moruti a hlola karabo. Ge letšatši le le kgauswi le go hlaba pele a tswalela modiro MaIndia a ile a fihla a tšea mohu a tloga le yena.
O ile a tswalela modiro a ba a tla a o bula gape ge go lebiwa dirapeng. Dirapeng ba ile ba hwetša MaIndia a le a dira tšeo ba sa di kwešišeng. Gona fao ba ile ba ngala ba gana le go dira tšeo di bego do swanetšwe go dirwa mo dirapeng. Ba ile ba boela gae fao gwa go tsoga ntwa magareng ga ba lelapa. Moilagae o ile a tsena ntwa yeo ka bogare. A e namola. O ile a leka go hlaloša ka ga dipoloko tše di fapanego tša ditšo le ditumelo. Balelapa e ile ya ba gona ba thoma go kwešiša. Ke tšeo tsa poloko ye e makatsago.

• Language: Pedi
• Publisher: Andrew Maroga
• Release date: Sep 9, 2021
• ISBN: 9781005417512

Andrew Maroga

Andrew Maroga o belegwe le go golela lefaseng la Driekop go la Burgersfort . O phethile dithuto tša gagwe Sekolong seo se Phagameng sa Mmiditsi. O ithutile tša bongwadi ka tlase ga tlhokomela ya mohu JR Maibelo. O ngwadile dipuku tše lesome-tshela tša Sepedi le tše pedi tša Seisimane. Ka ye nako ke moetapele wa dipolotiki ka tlase ga mokgatlo wa DA fao a bilego nkgetheleng ka dikgetho tša 2021. Ke moetapele wa lekala mo sekgaong sa gabo.

Book preview

Maikemišetšo a puku ye ga se go nyatša goba go nyefola ditumelo tša batho ba bangwe, eupša go lemoša mmadi ka ga tumelo tša batho ba bangwe. Ditumelo tše le ge e ba ga se tša fihla goba go tlwaelega dinageng tša gabo lena, tsebang di gona ebile di etla. Di sa le gakantšhe ge di fihlile. Le di amogele le be le di phethe ge go kgonega. Ka gona, mmadi a tsebe gore puku ye e ngwadilwe feela go ruta e sego go lweša batho.

Ditebogo

Ga se ga kae, mo motho a ka kgonago go ngwala puku ya go swana le ye. Ke rata go leboga bana ba ka, Tshepisho le Lebogang Maroga le mmago bona yo a fetilego mo lefaseng la ka keno, e le go Lily Mahlakwana- Maroga. Batho ba, ba bapetše karolo e bohlokwa, ka go kwešiša bohlokwa bja go ngwala puku ye. Ba ile ba se mphelele pelo le go nkgadimola ge ke be ke le gare ke ba hlokiša nako ya bona mo go nna. Ke re go bona, le tloga le e hlabane bana ba tau. Ke leboga thekgo ya lena go menagane. Le ka moso ditau tše šo. Kgobadi ge e boka boka e botile morwadi.

Segopotšo

Ka pukwana ye ke gopola mmago bana ba ka e lego mosadi wa ka wa lerato yo a ntlogetšego ge ke le gare ke ngwala puku ye. Yena ke Lily Mahlakwana - Maroga. Ke re go yena robala ka khutšo ngwetši ya ditau. Ge e le mororo wa gago lefaseng, o kwagetše kgole le kgauswi.

I

Hleng, ntumeleleng ke thome ka ‘go’ re’ Poulose ke yena mothomi wa tumelo ya sekriste. Morago ga gore a šegofatšwe le go kgethwa ge a sena a tlaiša batho bao ba bego ba latela Jesu, batho ka moka bao ba ilego ba mo latela, ba ile ba napa ba thoma go bitšwa Bakriste. Le ge e le gore bogolo bja batho bo ile bja sa mo tshepe, ba bangwe ba ile ba tia maatla ba mo šala morago. Ba thomile go bitšwa bakriste ge ba le kua Atonika. Leina le, le tlile ge go sena go lemogwa gore batho bao ba go sepela le Poulose, kae le kae mo ba sepelago, ba bolela ka Jesu Kriste, mong wa mabaka. Bjalo, le ge go le bjalo, bogolo le bo pepetla bja batho, bo sa dumela gore mothomi wa tumelo ya sekriste ke yena Jesu ka sebele. Go bolela seo e le go nnete, ga go bjalo. Jesu o be a le ka tumelong ya Juda. Mmagwe le papagwe e be e le Majuda.

Godimo ga motlotšwa yoo, Poulose, lehono go theilwe molokoloko le diphethephete tša maatla a diphuthego tšeo di thomilego go fapana ka bo tšona. Go tšona o tla kwa motho a re Nna ke tsena kereke ya Roma. Yo mongwe o tla kwa a re Nna ke tsena kereke ya Lutere. Yo mongwe a fetše ka gore yena o tsena ya ditente le ka go fapana ga tšona. Bjalo potšišo e a šala: naa tšona dikereke tšeo ga se dikereke tša go tšwa tumelong e tee? Go itia kgomo seroka phatla, le go bolela seo e le go therešo ke gore tše ka moka di tšwa mpeng e tee. Bogologolo re a lebala gore Poulose, yena mothomi wa yona tumelo ye, o ile kgalema ka bogale ge a re ‘go reng le thoma go fapana mo tumelong ya lena’. O ile a fetša a botšiša ge a eya pele a re:‘a monna a ka ba le bana bao ba fapanego ka difane? A go reng go tsoga diphaphano magareng ga lena? Go reng makgatheng ga lena, ba bangwe ba re bona ba latela Apolose, ba bangwe ba re ba latela Johanne, ba bangwe ba re ba latela Poulose, bjalo le bjalo? A le kolobeditšwe leineng la Poulose, Johannes, goba Apolose le ba bangwe bao le ba latelago? Nna ke leboga kudu gobane ga se ke kolobetše motho ntle le lapa la ba ga Stefanese feela.’

Hleng o boletše mogale’a Poulose. Hleng e kadieditše hlapi kgolo ya lewatle phampha madiba, a kolobiša letlapa ka meetse, a gopola gore le tla gola. Fela a boledišwa ke eng, ge e se ka fao batho re ikaketšago.