Thalaikeezh Vikithankal

அப்பாவுக்கு

முதற் பதிப்பின் முன்னுரை

வலியறிதல்

நான் எழுதத் துவங்கியபோது உலகில் உத்பாதங்கள் எதுவும் ஏற்பட்டுவிடவில்லை. என் 'அவதாரம்' யாரையும் பாதிக்கும் மகிமையும் பெற்றிருக்கவில்லை. சிலரைப் போல, கருவிலே திருவுற்று, பேனா பிடிப்பதைப்போல் விரல்களைக் குவித்துக்கொண்டு, நான் பிறக்கவில்லை. அல்லது குழந்தைப் பருவத்தில் ஒரு எழுத்தாளனுக்குரிய 'தேஜஸ்' என் முகத்தில் இருந்ததாக யாரும் கண்டு சொன்னதுமில்லை.

இருந்தாலும் நான் எழுத ஆரம்பித்தேன். புதுமைப்பித்தன் சொன்னதுபோல் 'சாகா வரம் பெற்ற, சரஸ்வதியார் அருள் பெற்ற வண்ணக் கவிராயன்' என்று என்னை நான் பாவித்துக்கொள்ளாததால், பசியில் கரைகையில் எந்த உமையும் எனக்கு ஞானப்பால் ஊட்டாததால் - என்பாட்டுக்கு எழுதினேன் - கவனிப்பாரின்றிச் சவலைப்பிள்ளை அழுவதைப்போல, 'ஊக்கம் குறையாமல் பொய்கள் புனைந்தேன்'. சில சிறுகதைகள் வெளியாயின. மார்பை நிமிர்த்திக்கொண்டேன்.

ஒவ்வொரு கதை வெளியாகும்போதும் - யார் இந்த 'நாஞ்சில் நாடன்' என்று தமிழ் இலக்கிய ரசிகப் பெருங்கூட்டம் தேடுவதாக எனக்குள் ஒரு மயக்கம். அந்தப் போதையில் மீண்டும் எழுதினேன்.

சிறுகதைகள் எழுதும்போது நான் சொல்ல வருகின்றவைக்கு ஒரு விஸ்தாரமான ஏரியா தேவையிருப்பதை உணர்ந்தேன். சில சமயங்களில் சிறுகதை என்ற மீடியத்தினுள் அடைபடாமல் அவை திணறுவதையும் கண்டேன். நான் எழுத ஒரு தூண்டுகோலாக இருக்கும் கவிஞர் கலைக்கூத்தன் 'தற்குறிகள் இதைத் தற்கொலை என்பார்கள்' என்ற என் சிறுகதையைப் படித்துவிட்டு உடனே ஒரு நாவல் எழுதச் சொன்னார்.

ஏற்கெனவே என் கதைகள் தீபம், கணையாழி, சதங்கை, செம்மலர், வஞ்சிநாடு போன்ற இதழ்களில் வெளியாக ஆரம்பித்திருந்தன. சிறுகதை என்ற மீடியம் எனக்குக் கட்டுப்பாட்டில் வந்துவிடவில்லை. என்றாலும் அதன் வேகங்கள், வீச்சுகள், சரிவுகள், எழுச்சிகள் இவற்றைப் புரிந்துகொள்ள ஆரம்பித்தேன். எனவே, அந்த மீடியத்தைக் கையாள முடியும் என்ற நம்பிக்கை எனக்கு ஏற்படலாயிற்று. ஆனால் நாவல்

எனக்கு மலைப்பாக இருந்தது.

எனினும் எழுத முற்பட்டேன்.

அச்சத்தோடு,

அவ நம்பிக்கையோடு.

இது ஒரு நாவலா அல்லது வெறும் கதைதானா? என்னால் சொல்ல முடியவில்லை. ஆனால் இரண்டுக்கும் நிறைய வேறுபாடு உண்டு என்பதை மட்டும் அறிந்திருக்கிறேன். எதிர் காலத்தில் ஒரு நல்ல நாவல் எழுத முடியும் என்ற நம்பிக்கையை இது எனக்குத் தந்திருக்கிறது. இந்த நாவலை எழுதி முடித்தபோது இருந்த இடத்தில் இப்போது நான் இல்லை என்பதை மட்டும் உறுதியாகச் சொல்லிக்கொள்வேன்.

இதில் திருமணமான ஓர் இருபத்து மூன்று வயதான இளைஞனின் மன அவசங்களை மட்டுமே பிரதானப்படுத்தியிருக்கிறேன். அவன் உணர்ச்சிகளை முழுமையாகக் கொண்டு வர முயன்றிருக்கிறேன். அதில் நான் வென்றாலும் தோற்றாலும் என்னைப் பொறுத்தவரை அது முடிந்துபோன கதை.

இது, என் முதல் நாவல்.

இது, காகமா குயிலா என்ற மயக்கம் உங்களுக்கு வேண்டாம். வசந்தகாலம் வரும்போது அது தீர்மானமாகட்டும்.

பம்பாய் 400 010 நாஞ்சில் நாடன்

01.08.1977

முன்னுரை

மாறாத விகிதங்கள்

தஞ்சைப் பெரியகோயிலைப் பற்றி இன்று யோசிக்கும்போது, அதை ராஜராஜனின் சாதனையாக மட்டும் பார்ப்பதில்லை. தமிழக வரலாற்றின் அம்சமாக, தமிழ்க் கலாச்சாரத்தின் படிமமாகவே பார்க்கிறோம். இடதுகால் தூக்கி நடனமாடும் நடராசரின் செப்புச்சிலை என்பது ஒரு கலை வடிவம் மட்டுமே அல்ல. பிரபஞ்ச நடனத்தின் ஒரு கணம் என்று விரிவுகொள்ளும் அர்த்தத்தைக் கொண்டிருப்பது. ஒரு நல்ல நாவலும் அப்படித்தான். மொழியின் அங்கமாகவே அது உருமாறிவிடுகிறது. நாவலாசிரியன் எனும் தனி மனிதனிலிருந்து கிளைத்து, வாசகர்களின் பலதரப்பட்ட வாசிப்பின் வழி சிதைந்தும், உருமாறியும், திரண்டும், செறிந்தும் காலவோட்டத்தில் அந்த மொழியின் இலக்கணம்போல, எழுத்து வடிவம் போல நாவலும் இணைந்துவிடுகிறது. ஒரு இலக்கிய வடிவம் என்ற குறுகிய எல்லையிலிருந்து விலகி மொழியின் சாராம்சம் என்ற பெரும் வெளியில் தன்னைக் கரைத்துக்கொள்ளும் தகுதிகளைக் கொண்ட நாவலையே, செவ்வியல் நாவல்களையே, இவ்வுலகம் தொடர்ந்து திரும்பத் திரும்ப வாசித்துக் கொண்டிருக்கிறது. ஒரு நல்ல வாசகன் குறிப்பிட்ட இடைவெளியில் செவ்வியல் நாவல்களை மீண்டும் மீண்டும் வாசிப்பதும் இதனால்தான்.

செவ்வியல் தன்மையை ஒரு நாவல் எப்போது அடைகிறது? அந்த நாவல் அந்த மொழியின், பண்பாட்டின், வாழ்வின் அடையாளமாகத் தன்னை நிறுவிக்கொள்ளும் அடிப்படைகளைக் கொண்டிருக்கும்போது, காலம் தாண்டியும் அந்த அடிப்படைகள் நிறம் மங்கிவிடாத திண்மையைக் கொண்டிருக்கும்போது, தலைமுறைகள் தோறும் அந்த நாவலைத் தேடி வரும் வாசகன் ஒவ்வொருவனுக்கும் அந்த நாவல் புதிய அர்த்தங்களையும் சிந்தனைகளையும் தரவல்லதாக இருக்கும்போது, அந்த நாவல் செவ்வியல் நாவல் என்ற தகுதியை அடைகிறது.

ஒவ்வொரு வாசகனும் அவனது வாசக அனுபவத்தில் எதிர்கொள்ளும் ஒருவித இறுக்கத்தின்போது அல்லது சலிப்பின்போது அவன் தன் வாசக நிலையைப் புதுப்பித்துக்கொள்ள செவ்வியல் ஆக்கங்களே கைகொடுக்கின்றன. சமகால இலக்கிய வடிவங்களோ ஆக்கங்களோ அவனது வாசக அனுபவத்திற்கு ருசிக்காதபோது அவன் மனம் இயல்பாகவே செவ்வியல் ஆக்கங்களை நாடுகிறது. ஒரு வகையில் ஒரு மொழியின் இலக்கியத் தடத்தை அல்லது போக்கை இத்தகையச் சுழற்சிகளே தீர்மானிக்கின்றன.

'தலைகீழ் விகிதங்க'ளின் சிவதாணு, நாவலின் கதாபாத்திரம் மட்டுமல்ல. 70களில் வேலையில்லாத் திண்டாட்டம் என்பது பட்டதாரி இளைஞர்களுக்கு ஒரு பெரும் துர்க்கனவாகவே இருந்தது. ஒவ்வொரு இளைஞனும் இந்தப் பாழ்வெளியைக் கடந்தாக வேண்டும் என்ற அவலம். அப்படிப்பட்ட ஒரு தலைமுறையின் பிரதிநிதியாகவே சிவதாணுவை நாம் காண முடியும். பள்ளிப் படிப்பைத் தாண்டி கல்லூரிக்குப் போவதென்பதே பெரும் சவால். உழவோ, நெசவோ எதுவாயினும் தனக்குப் பிறகு தன் மகனை அந்தத் தொழிலில் இருத்திவிட்டுக் கொஞ்சம் சுமையைக் குறைத்துக்கொள்ளலாம் என்று எண்ணத் தலைப்படும் அப்பாக்களின் மனதைக் கரைத்து, சுற்றங்களின் அண்டை அயலார்களின் விமர்சனங்களைத் தாண்டிக் கல்லூரிக்குச் சென்று படித்து இறுதியாண்டை நெருங்கும் போதே இனி என்ன செய்யப் போகிறோம் என்ற கேள்வியும், குற்றம் சொல்லத் தயாராக இருக்கும் சமூகத்தை எப்படி எதிர்கொள்ளப் போகிறோம் என்ற அச்சமும் ஒவ்வொரு இளைஞனின் வாழ்விலும் ஒரு பெரும் சாபம். படித்த படிப்புக்கு வேலை இல்லையென்றாலும் குடும்பத் தொழிலைக் கருத்தாக செய்யலாம் என்று அதிலும் இறங்கிவிட முடியாது. அதற்கான விமர்சனங்கள் வேறு ரகம். கல்லூரியில் இறுதியாண்டின்போதே Placement வாங்கிக்கொள்ளும் அதிர்ஷ்டம் படைத்த இன்றைய தலைமுறைகளுக்கு அந்த அவலமோ வலியோ தெரியாது. அந்த அவலத்தையும் வலியையும் அவமானங்களையும் சுமந்த ஒரு தலைமுறையின் வடிவம்தான் சிவதாணு. குடும்பம், மனைவி, உறவுகள் எனும் சிக்கலான தடைகளைத் தாண்டி படிப்பு, படிப்புக்கேற்ற வேலை, வேலைக்கேற்ற மரியாதை என்ற சமன்பாட்டை அடைய இளைஞர்கள் ஒரு காலகட்டத்தில் அடைந்த மன அவஸ்தைகளை, எதிர்கொண்ட அவமானங்களை, காலந்தோறும் நமக்கு இனங்காட்டும் ஒரு பண்பாட்டு அடையாளம்தான் தலைகீழ் விகிதங்கள்.

அரசு அமைப்பின் மீதான கோபம், அரசியல் சார்ந்த விழிப்புணர்வு, எதிர்ப்புணர்வு, போராட்ட குணம், எதைக் குறித்தும் தட்டிக்கேட்கும் விமர்சனப் பார்வை என்று இளைஞர்கள் சுரணையோடு இருந்த காலகட்டமும் இதுதான். அரசியல் சார்ந்தும் மொழி சார்ந்தும் பெரும் போராட்டங்களும் மாற்றங்களும் நடந்தேறிய அச்சூழலும் அதன் தாக்கங்களும் நாஞ்சில் வட்டாரத்தின் ஒரு கிராமத்தில் வேலைதேடும் பட்டதாரி இளைஞனாக இருந்த நாஞ்சில் நாடனிடம் பெரும் பாதிப்பை ஏற்படுத்தியுள்ளன. அறம் ஒன்றை மட்டுமே அடிப்படையாகக் கொண்ட இன்றைய அவரது சமூக விமர்சனங்களுக்கும், அரசியல் கோபங்களுக்கும் அடிப்படை அவரை உருவாக்கிய அந்தக் காலகட்டம்தான். வயிற்றுப்பாட்டுக்காகச் சொந்த மண்ணை நீங்கிச் செல்ல வேண்டிய துர்ப்பாக்கியத்தை அவர் மீது திணித்த சமூகத்தின் மீதும், அரசியலின் மீதும், அமைப்பின் மீதுமான நியாயமான கோபமே அவரது படைப்புகளாக, விமர்சனங்களாக வெளிப்பட்டு நிற்கின்றன. கல்யாணப் பந்தியிலிருந்து கைப்பிடித்து இழுத்து வெளியேற்றப்பட்ட சிறுவனின் துக்கமும், தகுதியிருந்தும் இங்கே உனக்கு வேலையில்லை என்று கண்காணாத் தொலைவுக்கு விரட்டப்பட்ட இளைஞனின் ரோஷமும் எத்தனை காலமானாலும் தணிந்துவிடாதுதானே?

கி.ரா.வின் 'கோபல்ல கிராமம்' (1976), தி.ஜானகிராமனின் 'மரப்பசு' (1975), காசியபனின் 'அசடு' (1978), நகுலனின் 'நினைவுப் பாதை' (1972), எம்.வி. வெங்கட்ராமின் 'நித்யகன்னி' (1975), கு. சின்னப்ப பாரதியின் 'தாகம்' (1975), அசோகமித்திரனின் 'தண்ணீர்' (1973), ப. சிங்காரத்தின் 'புயலிலே ஒரு தோணி' (1972) என்று தமிழின் சில முக்கிய நாவல்கள் இந்த நாவல் வெளியான காலகட்டத்தில் வெளிவந்துள்ளன. தீபம், கணையாழி, செம்மலர், சதங்கை போன்ற பத்திரிகைகளின் வழியாக ஒரு சிறுகதையாசிரியராக அறியப்பட்டிருந்த நாஞ்சில் நாடனுக்கு நாவல் வடிவத்தைக் கையாள்வது சுலபமாகவே இருந்திருக்கிறது. வட்டார வழக்கு சார்ந்த எல்லைகளோ மயக்கங்களோ தலைகாட்டியிராத அந்தச் சமயத்தில் நாஞ்சில் நாட்டுப் பின்னணியில் அதன் கதை மாந்தர்களை அவர்களது மொழியில் சித்தரிப்பது குறித்த சந்தேகங்களும் அவருக்கு இருந்திருக்கவில்லை. முதல் நாவல் என்ற தயக்கத்தைத் தாண்டிய நாஞ்சில் நாடனின் தன்னம்பிக்கைதான் தமிழின் முக்கியமான ஒரு நாவலைச் சாத்தியப்படுத்தியுள்ளது.

இயல்பான அங்கதம், தீர்க்கமான நாஞ்சில் வட்டார மொழி, சமையல் மணம், கொதிக்கும் சமூக விமர்சனங்கள் என்று நாஞ்சில் நாடனின் தனிப்பட்ட அடையாளங்கள் அவரது இந்த முதல் நாவலிலேயே இயல்பாக உருப்பெற்றுள்ளன. தொடர்ந்து சிறுகதைகள், நாவல்கள், கட்டுரைகள், கவிதைகள் என்று அவரது ஆக்கங்களில் இப்பண்புகள் மேலும் மேலும் செழுமை பெற்று நாஞ்சில் நாடனின் படைப்புலகை உருவாக்கித் தந்துள்ளன. சிவதாணுவின் தவிப்புகளே வேறொரு தளத்தில் இருத்தல் குறித்த அச்சமாக, நிச்சயமின்மைகளாக 'மிதவை', 'சதுரங்கக் குதிரை', 'எட்டுத் திக்கும் மதயானை' போன்ற நாவல்களில் விரிவுகொண்டுள்ளன. அடிப்படையில் நாஞ்சில் நாட்டில் வேர் கொண்டிருக்கும் எளிய விவசாய மனம், பிற வெளிகளின் பகட்டுகளை, பாசாங்குகளை ஏற்கவும் முடியாமல், விலக்கவும் முடியாமல் கொள்ளும் பதற்றங்களும் கோபங்களுமே அவருடைய கதாபாத்திரங்களாக உருவாகி நிற்கின்றன.

'தலைகீழ் விகிதங்க'ளை இன்று மீண்டும் செம்பதிப்பாக வாசிக்கும்போது, நாவலில் நாம் உணரும் தலைகீழ் விகிதங்கள் இத்தனை காலத்துக்குப் பிறகும் பெரிதாய் ஒன்றும் மாறிப்போய் விடவில்லை என்கிற கசப்பான, மரத்துப்போன யதார்த்தமே இந்த நாவலின் இன்றைய தன்மையை அடிக்கோடிட்டு நிற்கிறது.

எம். கோபாலகிருஷ்ணன்

-1-

மார்கழி மாதத்துப் பனிவெயில், காலையில் ககமாக இருந்த அதே வெயில், இப்போது மூன்று மணிக்குச் சுள்ளென்று தாக்கியது. இதமான காற்று தென்னை மடல்களின் ஓலைகளின் வழியே சலசலத்துக் குலவிக் கொண்டிருந்தது.

தேரேகாலின் தண்ணீர் மந்தமாக ஓடிக் கொண்டிருந்தது. அதன் தோலைச் சூரியன் மௌனமாக உரித்துக் கொண்டிருந்தான். காற்று அதை அள்ளிக்கொண்டு வந்து, திறந்திருந்த சன்னல் வழியாக வீட்டினுள் உதறியது.

சிவதாணுவுக்கு நல்ல தூக்கம். அந்த ஓட்டு வீட்டின் பின் கட்டு மங்களாவின் மேலிருந்த தட்டுதான் அவன் வாசஸ்தலம். பனங்கைகளின் மீது பலகையை அடுக்கி அதன் மீது கடற்பஞ்சும் வேப்பிலையும் பரப்பி, பச்சைச் செங்கல்களைப் படுக்கவைத்து மண்ணினால் தளம் போடப்பட்ட தட்டு.

சாணியால் மெழுகிய தரை சில்லென்றிருந்தது. வெளியில் அடித்த வெயில் ஓட்டுக்கூரையின் மேல் சூடாக்கித் தகித்தாலும், மெல்லிய பூங்காற்று அதைத் தணிக்க முயன்றது. கீழே, வீட்டிலிருந்து எழுகின்ற பாத்திரங்களின் 'ஙணஙண'ப்பும் மனிதர்களின் அரவமும் மேலே எட்டாத நிலையில், சிவதாணுவுக்கு அனந்த சயனம்; ஆனந்த நித்திரை.

எண்ணே . . . எண்ணே. . .

சிவதாணுவின் தம்பி செல்லப்பன். செல்லப்பனின் குரல் அவனை எழுப்பவில்லை, மிக மெதுவாகக் கிசுகிசுப்பது போல் கேட்ட குரல். சிவதாணுவின் கும்பகர்ண சேவையைக் கலைக்க இயலாமல் தோல்வியுற்றது. இதைச் செல்லப்பன் உணர்ந்திருக்க வேண்டும்.

திண்ணையின் மூலையில் சாய்த்து வைக்கப்பட்டிருந்த கல் மூங்கில் ஏணி வழியாக ஏறி, தலையை மட்டும் நீட்டி எட்டிப் பார்த்தான். அவன் நினைத்தது சரிதான். ஏணியைவிட்டுத் தட்டில் ஏறினான். மெதுவாகச் சிவதாணுவின் தோளைத் தொட்டு உசுப்பினான்.

எண்ணே . . . ஏ எண்ணேன் . . .

திடுக்கிட்டுக் கண்விழித்த சிவதாணு பரக்கப் பரக்கப் பார்த்தான்.

போலே பேசாம . . . . . . . . . மனிசனை உறங்க விடாம . . .

முணுமுணுத்துவிட்டு மீண்டும் கண்களை மூடிக்கொண் டான்.

எண்ணே . . . எந்திரி . . . உன்னை அப்பா கூப்பிடுகா . . .

அப்பா கூப்பிடுகிறார் என்ற உடன், சிவதாணுவுக்கு அவசர விழிப்பு. படுக்கையிலிருந்து எழுந்து உட்கார்ந்து கண்களைக் கசக்கிவிட்டு, கொட்டாவி ஒன்றைப் பிடுங்கி வெளியே எறிந்தான்.

சன்னல் வழியாக வீட்டின் பின்புறம் ஓடிய தேரேகாலைப் பார்த்தான். கால்வாய்க்கும் வீட்டின் புறவாசலுக்கும் இடையே ஓடிய ரோட்டிலிருந்து எருமை ஒன்று கால்வாயில் இறங்கிக் கொண்டிருந்தது. சற்று நேரத்தில், 'தொபீர்' என்று தண்ணீரில் விழுந்து புரண்டது. வாலைச் சுழற்றிப் 'படீர் படீ'ரென நீரில் அறைந்தது.

'எதற்காக அப்பா இப்போ கூப்பிடுகா . . .?' அவன் நிகழ்காலத்துக்கு வந்தான். வயலிலோ வெளியிலோ வேலை எதுவும் கிடையாது. வழக்கமில்லாமல், இப்போது தூங்குபவனை எழுப்புவானேன்?

'ஒருவேளை . . . அப்படி இருக்குமோ . . ? கிழவிதான் வாயைப் பிளந்துவிட்டாளோ . .?'

சிவதாணுவின் அப்பாவைப் பெற்ற ஆத்தாள் இழுத்துப் பறித்துக்கொண்டு கொஞ்சநாளாகக் கிடக்கிறாள். அவள் தான் சொல்லாமல் கொள்ளாமல் புறப்பட்டுவிட்டாளோ?

ஆனா இந்தப் பயலைப் பார்த்தா அப்பிடித் தெரியலியே . . . பய சிரிச்சுக்கிட்டில்லா நிக்கான் . . ? வேற ஏதாவது தான் இருக்கும் . . .

சீக்கிரம் வாண்ணேன். உடுப்பையும் எடுத்துப் போட்டுக்கோ . . . அடுக்களையில் போய் முகத்தைக் கழுவிட்டு சட்டுண்ணு திண்ணைக்குப் போ . . .

என்னடா இது? ஒரு நாளுமில்லாத திருநாளா இருக்கு . . . சட்டையையும் போட்டுக்கிட்டுப் போகணுமாம் . . . ஒரு சமயம் தாழக்குடி கோப்பரேட்டிவ் பேங்கிலே யூரியா வந்திருக்குமோ . . ? ஆனா இப்போது யூரியாவை வாங்கி எங்கே கொண்டு போட . . . பயிரெல்லாம் கதிரான பிறகு . . . அடுத்த பூவுக்குண்ணு வாங்கி ஸ்டாக் பண்ணுகிற மாதிரி ஏது பணம் இங்கே . . ?

இந்தச் சிந்தனையின் தடத்தில், தட்டைவிட்டு ஏணி வழியாகக் கீழே இறங்கினான். புறக்கடையில் போய் முகத்தைக் கழுவித் துடைத்துக்கொண்டு தலையையும் சீவினான். சட்டையை மாட்டிப் பொத்தானைப் போட்டுக்கொண்டு திண்ணைக்குப் போனான்.

மங்களாவின் வாசல்படியில் நின்று திண்ணையுள் பார்த்தான். அங்கே ஐந்தாறு பேர் உட்கார்ந்திருந்தார்கள். வடக்குச் சுவரோரம் அப்பா. அவரைச் சபாநாயகராகக் கொண்டு பக்கத்து மூன்று பேராக அவர்கள். மூன்று பேர் பின்புறம் காட்டி இருந்ததால் முகம் தெரியவில்லை.

அவர்கள் முன்னால், மர முக்காலியில் தண்ணீர்ச் செம்பு. இரண்டு மூன்று பித்தளைத் தம்ளர்கள். வெற்றிலைச் செல்லம். இடைவழிக் கதவின் ஓரத்தில் சிவதாணு சுவரில் சாய்ந்து நின்றான்.

'தங்கச்சியைப் பொண்ணு பார்க்க வந்திருப்பாங்களோ . . . ஆனா பொம்பளைங்க ஒருத்தரையும் காணோமே . . . ம் . . . லெவி அளக்க வந்திருப்பாங்களோ . . ! நெல்லு கெடந்தால்லா லெவி அளக்க . .? இங்கேதான் அடுத்த மாசம் வித்தைத் தாலா அவிக்கணும் போலிருக்கு . . . அதுமில்லே . . . தாழக்குடி பார்த்தியாரைத்தான் எனக்குத் தெரியுமே! இது வேற யாரோ?'

வந்திருந்த அறுவரில், கிழக்கு வரிசையில் நடுவில் இருந்தவர் திரும்பி அவனைப் பார்த்தார். அவரைச் சிவதாணு அடையாளம் கண்டுகொண்டான். நாவல்காட்டுக்காரர் சண்முகம் பிள்ளை. அவர் அவனைப் பார்த்துப் புன்னகைத்தார். மற்றவர்களைப் பார்த்து மெதுவாக ஏதோ சைகை செய்தார்.

சிவதாணுவுக்குப் புரிவது போலிருந்தது. இவர் என்னைப் பார்த்துச் சைகை செய்வானேன்? வந்திருந்தவர்களில் கண்ணாடி போட்டுக் கொண்டிருந்தவர் கேட்டார்.

உனக்கு பி.எஸ்.சியிலே எந்த கிளாசுப்பா. . ?

ஹை செகண்ட் கிளாஸ் . . .

என்ன மெயின் . . ?

மேத்ஸ், ஃபிஸிக்ஸ், ஸ்டாடிஸ்டிக்ஸ் சப்ஸிடரி . . .

ரெண்டுவருசமாக சும்மா இருக்கியாமே . . . ஓறண்டையும் எழுதிப்போடல்லியா . . ?

சிவதாணுவுக்குக் கோபம் வந்தது. அவனுடைய அந்தரங்கத்தை நோண்டி, பலவீனமான பாகத்தைக் கண்டுபிடித்துக் குத்திக் குடைவது போலிருந்தது அவர் கேள்வி. அவனுடைய அப்பா அங்கே இல்லாமலிருந்தால், சரியாகப் பதில் சொல்லி இருப்பான்.

அவனுடைய தர்மசங்கட நிலையை உணர்ந்தோ என்னவோ, அப்பா உதவிக்கு வந்தார்.

எழுதிப் போடாம என்னா . . ? கெடைக்காண்டாமா . .? நமக்கென்ன சிபாரிசுக்கு ஆளும் பேருமா இருக்கு . . . இல்லே நாலாயிரம் ஐயாயிரம்னு கைக்கூலி கொடுக்கப் பணம் இருக்கா? ரெண்டுமில்லே . . . அவனும் ரெண்டு வருசமாக அலையத்தான் செய்யான் . . . கெடைக்கும், காலம் வந்தா . . ?

அவனுக்கு ஆச்சரியமாக இருந்தது. நம்முடைய அப்பாவா இவ்வளவு ஆதரவாகப் பேசுகிறார்?

"தொரைக்கு ஒரு மணி அடிக்கதுக்குள்ளே பசி எடுத்துட்டுதா? பெரிய பேஷ்க்கார் அங்கத்தை பாரு ... சாப்பிட்டு கிட்டு கச்சேரிக்குப் போணுமோ . .?

இப்ப என்னத்துக்கு எட்டு ரூவா? அது வாங்கணும் இது வாங்கணும்னு ரெண்டு வருசமாக ஒனக்குத் தந்த பணத்தைச் சேர்த்து வச்சிருந்தா பனையடி வயலு ஒத்தியைத் திருப்பியிருக்கலாம் . . . சோலிக்கு எழுதிப் போட்டுப் பாழாப் போனது போரும் . . . போய் எருமைக்கு ஒரு சாக்குப் பில்லு அறுத்துக்கிட்டு வா . . .

இவ்வளவு வளந்தும் புத்தியில்லியே . . . உழவைக் கருத்தா உழப்பிடாதா . . ? ஒண்ணுலே உழவுக்குள்ளேயே விட்டுக்கிட்டு வாறே . . . இல்லேண்ணா ஈரணை ஏரு வலத்தை வச்சுப் பிடிக்க . . . நீங்களெல்லாம் என்னத்துக்குத்தான் படிக்கேளோ தெரியல்லே . . . கலப்பையிலே அடஞ்சிருக்கிற மண்ணைத் தள்ளு . . ."

. . . இப்படியெல்லாம் தார்க்கம்பால் குத்தி எடுக்கிறவர், இன்று ஆதரித்து அனுசரணையாகப் பேசுகிறார் என்றால் -

சும்மா எழுதிப் போட்டுக்கிட்டிருந்தா ஒண்ணும் புண்ணியமில்லே . . . மெட்ராஸ்லே போய் ரெண்டு மாசம் இருந்து பார்க்கப்பிடாதா . . ? - வயது முதிர்ந்த ஒருவர் கேட்டார்.

அப்பிடித்தான் யோசிச்சுக்கிட்டிருக்கேன் எல்லாம் வயலறுக்கட்டும் . . . சவம் கடத்தோட கடன்... நாலு கோட்டை நெல்லை வித்துண்ணாலும் அனுப்பிப்போட வேண்டியதுதான். இங்கிணயே எத்தனை நாள் முட்டைச் சொறிஞ்சுக்கிட்டு இருக்கது . . ?

அப்படிச் செய்யலாம் . . . எல்லாம் இந்த ஏற்பாடு சரியா வருகா பார்ப்போம், வந்தா, நீங்க ஒண்ணும் கவலைப் படாண்டாம். வேலை பார்த்துக் கொடுக்கது எங்க பொறுப்பு ஆயிருமே . . !

சிவதாணுவுக்கு எல்லாம் பளிச்சென்று விளங்கியது,

'நம்மை விலை பேசுவதற்காக வந்த கூட்டம் இது' என்று அவனுக்குப் புரிந்து போயிற்று. சந்தையில் மாடு பிடிக்க வருகிறவர்களைப் போல, இப்போது இவர்கள் 'மாட்டை'ப் பார்த்துவிட்டுப் போக வந்துள்ளார்கள். இனிமேல் தரகர்கள் மூலம் துவர்த்தினுள் கை போட்டுப் பேரம் பேசுவார்கள். பேரம் படிந்தால் இந்த மாடு, அவர்கள் வீட்டுக் கிடாரியின் கழுத்தில் தாலிக் கயிற்றைக் கட்டும்'

அவனுக்கு அருவருப்பில் உடல் சிலிர்த்தது.

அப்போ நாங்க வாறோம் . . . யோகம் இருந்தா எல்லாம் நடக்கும் . . .

'யோகம் இருந்தால்' - யாருக்கு? சிவதாணுவுக்கு எரிச்சலும் சிரிப்பும்.

அவர்கள் விடைபெற்றுப் போகும்போது சண்முகம் பிள்ளை உதட்டில் நெளிந்த புன்னகை அது, அவனை ஆதரித்ததா இல்லை அச்சுறுத்தியதா?

-2-

'மாடு' பார்க்க வந்திருந்த கூட்டம் இறச்சகுளம் நோக்கிப் பஸ்சுக்காக நடந்துகொண்டிருந்தது.

என்னடே . . . சொக்கலிங்கம்? பையன் எப்படி? ஒண்ணும் வாயையே தொறக்க மாட்டம்கயே . .? சண்முகம் பிள்ளை கேட்டார்.

பையனைப் பார்த்தா நல்லபடியாகத்தான் இருக்கான் . . . கண்ணிலே ஒரு துடி இருக்கே கவனிச்சீரா? ரெண்டு வருசமாக வேலை கிடைக்கலியாண்ணு அம்மாச்சன் கேட்ட உடனேயே அவன் சிலிர்த்துக்கிட்டுத் தான் நிண்ணான். . . அவனுக்க அப்பா சிதம்பரம் பிள்ளை இல்லேண்ணா, சூடாப் பதில் சொல்லியிருப்பான் . . . நல்ல சொணை உள்ளவன்தான். . ! - பெண்ணைப் பெற்றவர், சொக்கலிங்கம் பிள்ளை.

எனக்குத் தெரியாதா பின்னே . . . அதுக்குத்தாலா காலம்பற சடங்கு வீட்டிலே உன்னைப் பார்த்த உடனேயே சொல்லீட்டிருக்கேன் . . . பக்கத்திலேதான் . . . கையோட பையனைப் பார்த்துக்கிட்டுப் போயிரலாம்ணு . . . பய படிச்சிருக்கான் . . . நல்ல புத்திசாலி, வேலை கிடைக்கல்லைண்ணாலும் கவலைப்படாம வேட்டியை மடிச்சுக் கெட்டிக்கிட்டு வயல்லே இறங்கீருவான்னு . . . பாவமா இருந்தாலும் படிச்ச பையனா, கெட்டிக்காரனா, நல்ல மரியாதைக்காரனா இருக்கணும்னு நீ சொன்ன உடனேயே அவன் யாபகம் தாலா எனக்கு வந்தது . . . உனக்கு மச்சினனும் அம்மாச்சனும் கூட வந்தது நல்லதாப் போச்சு . . . அவ்வோளும் பார்க்க முடிஞ்சுதில்லா . . ?

சொக்கலிங்கம் பிள்ளையின் மாமனார் மனகாவலப் பெருமாள் பிள்ளை திருவாய் மலர்ந்தார்.

அது சரிடே, ஆனா சிதம்பரம் பஞ்சப்பாட்டுல்லா பாடுகான் . . . பயலுக்கும் குடியிருக்க வீடுகூடக் கிடைக்காது போலிருக்கே! கஞ்சித் தண்ணிக்கும் பஞ்சம்தானோ என்னமோ? படிச்சிருக்கான். சரிதான், பொண்ணையுங் குடுத்து, வேலையையும் வாங்கிக் குடுத்து . . . ம் . . . அது என்ன கூறுகெட்ட ஏற்பாடுடே . . ?

அட நீரு ஒண்ணு . . . அந்தக் காலத்து ஆளா இருக்கீரே . . ! உமக்குத் தெரியுமா? நம்ம சாதியிலே படிச்ச பையனாக் கிடைக்கிறது கஷ்டம்லா, வசதி உள்ளவனாப் பார்த்தா அவன் மூணாங் கிளாசுக்கு மேலே தத்தக்கா புத்தக்கா போடுகான். நம்ம தாழக்குடி ஐயாப்பிள்ளைக்கு மகன் ஒருத்தன் இருக்கான் . . . கணியாகுளம் பத்திலே நாலு கோட்டை விதைப்பாடு அவனுக்குப் பேருக் கூலி சொம்மு கிடைச்சிருக்கு . . . அவனைப் பார்க்கலாமா . . ? பயலும் மாடு மாதிரி வேலை செய்வான், ஆனா கையெழுத்துப் போடணும்னா பெருவிரல்லே மசியைத் தடவ வேண்டியது தான் . . .

அதுக்காச் சுட்டி இப்பிடியா குடிக்கக் கஞ்சியும் குடியிருக்க வீடும் இல்லாதவன் கையிலே பிடிச்சுக் குடுக்க முடியும்?

பாட்டாக்கு இன்னும் உலகம் தெரியல்லியே? இன்னா பாரும் . . . உம்ம பேத்தியாள் ஸ்கூல் பைனல் பாசாயிருக்கு . . . கடவுள் புண்ணியத்திலே நல்ல வசதியாட்டும் இருக்கியோ . . . உம்ம பணத்தையும் செல்வாக்கையும் வச்சு அந்தப் பையனுக்கு ஒரு சோலி வாங்கிக் குடுமேன் . . . நாளைக்கு பேங்கிலேயோ இல்லேண்ணா சர்க்கார்லியோ வேலை கெடைச்சுப் போச்சுண்ணா உமக்குத்தாலா பெருமை? பெரிய பணக்காரனுக்கு வாழ்க்கைப்பட்டு குறுணி அரிசி பொங்கிப் போட்டு புழுக்கச்சி வேலை செய்து சாகிறதைவிட இது உமக்குக் கசக்கவா செய்யீ?

இதுவரை ஒன்றும் பேசாமல் சும்மா வந்த சொக்கலிங்கம் பிள்ளையின் மைத்துனர் நல்லகுற்றாலம் கண்ணாடியைக் கழற்றித் துடைத்துக் கொண்டே சொன்னார்.

அதும் சரிதான் . . . ஆனா சிதம்பரம் பிள்ளை பெரிய சம்சாரி போலிருக்கே . . ! பையனுக்குத் தங்கச்சி ஒருத்தி சமைஞ்சு அஞ்சாறு வருசம் இருக்குமாமே? அதுக்க கல்யாணம் இருக்கு . . . நாலஞ்சு கண்ணுங்கயந்தலைகள் வேறே. . . அதையெல்லாம் யோசித்துப் பார்த்தேளா . . ?

அது ஒரு பாயிண்டுதான். ஆனா அந்தப் பிள்ளையை ஆயிரமோ ரெண்டாயிரமோ உருப்பிடி போட்டுத் தள்ளி விட்டிரப் போறான் . . . சின்னப்பயக்க எல்லாரும் படிக்கத்தாலா செய்யானுக . . ! அதைப்பத்தியெல்லாம் நீரு ஏன் யோசிக்கேரு . . ? நம்ம பிள்ளை அந்த சன சமுத்திரத்திலேயா போயிப் பொங்கிப் போடப்போகு . . ? சட்டுபுட்டுண்ணு ஒரு வேலை வாங்கி குடுத்துப்போட்டா, நாகர்கோயில்லே ஒரு வீடெடுத்து வேற வச்சாப் போச்சு! அதெல்லாம் நம்ம பொண்ணு சாமர்த்தியம் ஓய். அதையெல்லாம் இப்பமே யோசிக்காதேயும் . . .

இதுவரை பேச்சைக் கேட்டுக்கொண்டு மௌனமாக வந்த இருவரில், சொக்கலிங்கம் பிள்ளையின் அண்ணாச்சி மகன் சுந்தரலிங்கம் சொன்னார்.

பொருத்தமெல்லாம் பார்த்துப் பேசித் தீர்மானம் ஆகட்டும் . . . அதுக்குள்ளே என்ன அவசரம்? இது மார்கழி மாசம். பங்குனியிலேதானே நமக்கு சௌகரிப்படும்? அதுக்கு முன்னே அவனுக்கு ஒரு வேலை கிடைச்சாலும் நல்லது தானே . . .

வேலை கிடைச்சா அவனுக்கு அப்பா இப்பிடியா பேசுவாரு? சித்திரைத் திருநாள் மகாராஜா கணக்கா கால் மேலே கால் போட்டிர மாட்டாரா? இப்பம் பிள்ளைப்பூச்சி மாதிரி இருக்காரு . . . மகனுக்குச் சோலி கிடைச்சாச்சுண்ணா நல்லபாம்பு மாதிரி படம் எடுத்துக்கிட்டுதாலா நிப்பாரு . . !

ஆமா . . ! எல்லாம் எவ்வளவு செய்யதா உத்தேசம்டே சொக்கலிங்கம்? சண்முகம் பிள்ளை கேட்டார்.

என்ன அம்மாச்சா இப்பிடிக் கேட்டுட்டீரு . . . உமக்குத் தெரியாதா? எனக்கு இருக்கதெல்லாம் ரெண்டே பொண்ணு . . . எல்லாம் அதுகளுக்குத்தானே! அதுக சந்தோசமா இருந்தா சரிதான். . .

அது எனக்குத் தெரியாதா? இருந்தாலும் . . . நமக்குள்ளே பேசிக்கிடுவோம் . . . எதிராளி கேப்பானா மாட்டானா? எல்லாம் உனக்குச் சொந்தச் சம்பாத்தியம் . . . பிறகு, நீ என்ன வேணும்னாலும் செய்யலாம். . . எல்லாம் மனுசாள் காரியந்தாலா. . ! முதல்லேயே எல்லாம் அறப்பேசீரணும்ணு எதிராளி நினைக்கத்தாலா செய்வான் . . !

சண்முகம் சொல்லுகதும் சரிதான் . . . செய்திரணும்னு தீர்மானிச்சாச்சுண்ணா இன்னது செய்வோம், இன்னது செய்யமாட்டோம்னு சொல்லீருகது நல்லதுதாலா? பொறவு உள்ளது பொறவு . . . பொறவு நீ குடுப்பேண்ணும் மாட்டேன்ணு அவாளுக்கு என்ன நிச்சயம் . . ?

அதுக்கில்லே மாமா . . . எனக்கென்னமோ பையனைப் பார்த்தா திருப்தியா இருக்கு. சிதம்பரம் பிள்ளை வசமா வந்தாருண்ணா, பங்குனிலே கல்யாணத்தை முடிச்சிரலாம்னு பார்க்கேன் . . . பார்வதிக்கு இப்போ இருக்கிற நகையெல்லாம் பத்துப் பன்னிரண்டு ரூவாய்க்குக் காணும் . . . கல்யாணத்தை நாமே நடத்திப்போடலாம். அவாளுக்கும் செலவில்லே! இருக்கிற சொத்திலே பாதி எழுதி வச்சிரலாம் . . . ஆனா அனுபவம் என் காலத்துக்கு அப்புறம்தான் . . . மாமா என்ன சொல்லுகியோ?

'வெள்ளையும் சொள்ளையுமாக' நாலரை மணி வெயிலில் தார் ரோட்டில் நடந்துகொண்டிருந்த அவர்களின் எதிரே, குடையைப் பிடித்தபடி கோலப்ப பிள்ளை வந்துகொண்டிருந்தார். ஒரு கையில் சிறிய குட்டிச் சாக்கு மூட்டை, சட்டை போடாத கரிய உடம்பில் குறுக்காகத் துவர்த்து விழுந்திருந்தது. குடவண்டி வயிற்றில், தொப்புளுக்குத் கீழே வேட்டியை மடித்துக் கட்டியபடி, கொள்ளை போகிற அவசரத்தில் வந்தவர் இவர்களை நெருங்கியதும் சற்றுத் தாமதித்தார்.

முகத்தில் அரும்பி நின்ற வியர்வையைத் துவர்த்தால் துடைத்துக்கொண்டு எதிரே வருகின்றவர்களை ஏறிட்டுப் பர்த்தார்.

என்னா பாட்டா . . ? இந்த வேனாவெயில்லே எங்கேருந்து ஓடி வாறேரு . . ? கையிலே குட்டிச் சாக்கு வேறே கணிசமாக இருக்கு . . ! ஓகோ, சந்தையிலேருந்து வரவோ?

யாரு? சொக்கலிங்கமா? அட..! நீ எங்கடே இந்தப் பக்கம் வந்தே? எங்கேயிருந்து இந்த வெயில்லே எல்லாரும் படையெடுத்து வாறயோ?

தாழக்குடியிலே நம் சூனமானா பொண்ணுக்குச் சடங்கு . . . அதான் சாப்பிட்டுப்போட்டு வெயில் தாந்து நடந்து வாறோம் . . . இறச்சகுளத்திலே போய்ப் பஸ்சு பிடிக்கணும் . . .

அட . . . அதுக்கு ரெண்டு மைல் நடப்பாளா யாராம்? தாழக்குடியிலே பஸ்சு கிடைக்குமே . . !

கிடைக்கும் . . . ஆனா ஒரே கலியாணக் கூட்டமால்லா இருக்கும் . . ? அங்கிண காத்துக் கிடக்கிற நேரத்திலே இப்பிடி நடந்திரலாம்ணுதான் . . .

நல்லாருக்கு . . . அதுக்காக வயசான காலத்திலே அம்மாச்சனையும் இந்த வெயில்லே போட்டு இழுப்பாளாக்கும் . . . ஒரு கார் பிடிச்சுப் போனா என்னடே . . ? சம்பாதிச்சு எல்லாத்தையும் போகச்சிலே கொண்டுகிட்டா போகப்போறே . .?

சிரித்துக்கொண்டே சொக்கலிங்கம் பிள்ளை விடைபெற்றுக் கொண்டார். கொஞ்சதூரம் போன பிறகு சொன்னார் -

"காலனாப் போவான், பெரிய எமனாங்கும் . . . துப்புக் கிடைச்சுதுண்ணா அதை இதைச் சொல்லி கலியாணத்தையே நிறுத்திப் போடுவான் . . . சரியான கரிக்கொட்டை அண்ணன் . . . முளைச்ச மயிரெல்லாம் கள்ள மயிரு . . . நல்ல காலம்,