CISKA stal die baksel gemmerkoekies op die tafel met koekies, laagkoeke en brode uit. Dié tyd van die jaar is haar klein bakkery en kafee soos ’n mini-miernes. Daar is ses tafels met stoele waar mense kan sit en tee of koffie drink. Sy en haar twee assistente, Elsie en Susie, werk hard. Kersfees is oor twee dae en daar is ’n toeloop, ook vir haar vrugtekoeke dig van die neute en vrugte.
Toe sy twee jaar gelede na dié klein dorpie langs die kus getrek het, geskei en gebroke, het sy besluit om haar brood te verdien deur haar eie bakkery te begin. Sy het eintlik nie verwag om so suksesvol te wees nie, maar die mense van die omgewing het haar gou ontdek.
Al die tafeltjies is beset, behalwe een in die hoek. ’n Lang man in jeans en ’n leerbaadjie kom in, kyk rond en loop reguit na die oop tafel waar hy gaan sit.
