DIE Wêreldbekerrugbytoernooi van 8 September tot 28 Oktober is ’n hoogtepunt op die internasionale sportkalender. Vanjaar sal wedstryde in nege stadions in Frankryk gespeel word. Ons kyk waar dit gebeur en watter besienswaardighede in dié Franse stede op besoekers wag.
WAAROOR GAAN DIT?
Die Wêreldbeker is ’n vierjaarlikse wêreldkampioenskapstoernooi vir nasionale rugbyspanne. Vanjaar is dit presies 200 jaar sedert William Webb Ellis in 1823 rugby as sportsoort geskep het. Dit sal boonop die 10de Wêreldbekerrugbytoernooi vir mans wees. Nóg ’n spesiale feit is dat Suid-Afrika die verdedigende kampioen van vanjaar se toernooi is. Ons het Engeland in 2019 se eindstryd verslaan.
