Nuus Aktueel Misdaad
DIT is die tweede keer in vier maande dat hy deurloop onder insetdiewe. Só sê ’n boer van die Coligny-distrik oor die meer as R1 miljoen se chemikalieë wat by hom gesteel is. “In ons geval is 7% van die geldwaarde van ons direkte inset gesteel. Dis skrikwekkend,” sê hy.
Dié skade is maar ’n druppel aan die emmer van miljoene rande se skade wat boere ly omdat die polisie nie in staat is, of bereid is, om hulle te help nie.
Private ondersoekers wat boere bystaan met misdaadvoorkoming en om die skuldiges op te spoor meen dié diefstalle vorm deel van ’n insetdiefstalsindikaat met sy oorsprong in Bothaville.
“Ek werk tans met 25 boere wat die afgelope drie jaar deur die sindikaat beroof is en na raming beloop die totale skade meer as R200 miljoen. Dit is net die sake waarvan ons bewus is,” sê een ondersoeker wat nie sy naam bekend wil maak nie.
Die sindikaat bestaan volgens die ondersoekers uit Suid-Afrikaners en Mosambiekers en hul teikenmark is saaiboere in Noordwes en die Vrystaat. Die Vrystaat-deel van die sindikaat werk skynbaar uit Bothaville en