‘EK KAN DOEN WAT EK WIL, WANT EK GAAN NIE KONING WORD NIE’
DIS nóú moeilik om jou dit voor te stel, maar prins Andrew was eens sy broerskind prins Harry se gunstelingoom.
Nie meer nie. Deesdae is omtrent die enigste ding wat hulle in gemeen het hul status as koninklike uitgeworpenes – al is dit om heel verskillende redes.
Albei dié mans, wat op hul tyd die spaarwiele vir die Britse troon was, is deesdae erg ongewild onder die Britse publiek. ’n Onlangse peiling het getoon net 22% van Britte het ’n “gunstige” siening van Harry, terwyl net 7% enigiets goeds oor Andrew te sê het.
Dit is maklik om te vergeet, maar daar was ’n tyd toe Harry en Andrew albei onder die publiek geliefd was – en boonop baie van mekaar gehou het. Toe Harry nog ’n rooikopknapie was, het hy en Andrew goed oor die weg gekom omdat hulle albei in die weermag belanggestel het. Harry was mal daaroor om te luister hoe sy oom vertel van sy heldedade as helikoptervlieënier in die Falklandoorlog; en op sy beurt het Andrew dit baie geniet om die kind met sy stories te vermaak.
Dit het ongetwyfeld ’n groot indruk gemaak op die jong prins, wat later sy eie verhale sou vertel oor hoe hy vanuit ’n helikopter in Afghanistan op die Taliban oorlog gemaak het.
Maar dit is nie ál wat hulle in gemeen het nie. Albei het ’n groot deel van hul lewe as “spaarwiele” gedien – koninklike seuns wat op die reserwebank moes wag ingeval hul ouer broer kinderloos sou sterf voor hulle die troon kon bestyg.
Om as spaarwiel groot te word, soos Harry dit in sy outobiografie, , duidelik gemaak het, is ’n aardige posisie. Hoewel hy intussen tot vyfde op die lys van aanspraakmakers op die troon (en Andrew tot