![f0082-01](https://article-imgs.scribdassets.com/8ths56qf9cb5808g/images/fileKWZIRZPI.jpg)
SY WOU vir haar kleindogter ’n kar koop, maar toe sy weer sien, is sy duisende rande armer en haar kleindogter sit steeds sonder wiele.
“As jy in Suid-Afrika wil oorleef, moet jy wakker wees,” skryf ’n leser onlangs aan Huisgenoot.
Nadat dié ouma besluit het sy wou die kleindogter “help om ’n karretjie te koop”, is die nodige voorsorg getref om seker te maak die motorhandelaar en die kar bestaan wel en dat die verkoopprys regtig R50 000 is.
Of so het hulle gedink.
Nadat sy R25 000 aanlyn betaal het en verder met die koper wou praat, was dié skielik skoonveld. Die leser se bank kon nie help om die geld terug te kry nie.
“Help ons om die slaggate raak te sien,” vra sy nou. “Vertel ons watter slenters in omloop is.”
Want dié skelmspul is maar een van vele wat mense deesdae onkant vang. Dit kan moeilik wees om skelmstreke betyds uit te ken.
Die rampokkers wat jou wil inloop, is dikwels deel van gesofistikeerde sindikate, verduidelik Manie van Schalkwyk van die organisasie Southern African Fraud Prevention Service (SAFPS).
“Ons algemene raad is as ’n verbruiker die geringste vermoede het iets is ’n skelmstreek, dan ís dit waarskynlik een.”
Huisgenoot het van die algemeenste slenters ondersoek.
![f0083-01](https://article-imgs.scribdassets.com/8ths56qf9cb5808g/images/fileDEHUWFSB.jpg)
‘KYK HIER NA DIE GOEDKOOPSTE KAR OP DIE MARK’
Skelms vertel graag hulle het ’n spotgoedkoop kar te koop. Die vorige eienaar was byvoorbeeld kammakastig ’n ou tannie wat skaars daarmee gery het.
En as jy nie wikkel om dadelik te betaal nie, gaan iemand anders dit voor