Wanneer hy om die braaivleisvuur met sy vriende in die graanbedryf gesels het, het Gerhard van Deventer van Groen Erfnis-boerdery by Buffeljagsrivier besef vrugteboere kan nie saampraat wat presisietegnologie betref nie.
“Ons was agter met dié tegnologie en ons het elke dag net meer en meer agter geraak. My pa het my altyd geleer jy hoef nie voor te hardloop nie, maar jy móét bybly met tegnologie,” sê Gerhard, sedert 2001 die tweede geslag wat op Groen Erfnis met perskes, pruime, pere en sitrus boer.
Sowat vyf jaar gelede kon hy geen presisietegnologie vir hoëwaardegewasse soos vrugte opspoor nie. Gerhard en Jason Tomlinson van JD Implemente op Swellendam het toe koppe bymekaar gesit om oplossings te vind.
“Ek sou sê ’n vrugteboerdery kan meer baat vind by presisie wat kunsmis, chemiese produkte en kalk betref as die graanbedryf, want ons boer met meerjarige gewasse en ’n vrugteboord moet 20, 30 jaar oud word.”
Vandag bespuit Gerhard akkuraat met ’n aangepaste presisiespuit, en dien kunsmis en produkte soos gips en kalk wisselend toe met twee omgeboude uitstrooiers. In