HAAR eerste brief wat sy ooit geskryf het, was aan Kersvader. Sy was toe net sewe jaar oud, maar sy het dit al die jare bewaar.
“Daai briefie het baie jare gehang in ons huis op Middelburg, agter die hoërskool. Dis nou iewers in ’n boks,” vertel Lynette Strydom.
Dit was dekades gelede, en sy en haar gesin woon die afgelope 11 jaar al hier in Gqeberha. Maar die liefde vir briewe skryf het haar nooit gelos nie, en êrens in hierdie karaktervolle huis vol herinneringe is – benewens daardie kinderbriefie aan Kersvader – ook drie plakboeke vol briewe wat sy deur die jare aan haar Huisgenoot-familie geskryf het.
Daar is nie ’n week wat verbygaan sonder dat daar twee of meer briewe se inboks beland nie. Nie om te kla of te kritiseer nie, maar om ’n woordvenster op die lewe rondom haar te bied.