LIGGING VRYSTAAT
INLIGTING
Plek: Springfontein
Plaas: Grootzuurfontein, Bobsfontein en Jakhalsfontein
Grootte: 2 632 ha
Vertakkings: Merino’s en ’n Rooipoenskop-stoetery, skaapvoerkraal
Veld: Suidwestelike karoo-agtige veld van die Vrystaat en skyn-karooveld
Reënval: 423 mm/jaar
KORTOM
■ ’n Wetenskaplike weidingstelsel laat dié Suid-Vrystaatse boerdery se inkomste met R147 per hektaar verhoog en die risiko vir droogte van 65% tot 20% afneem.
■ Die swakste deel van die plaas se weidingskapasiteit het tot 17 ha/GVE verbeter teenoor 28,7 ha/GVE in 2004.
■ ’n Driegroep-kampstelsel met ’n ritme van vier seisoene word toegepas.
Die aansienlike veldverbetering op ’n aanvanklik weidingsarm skaapplaas in die Vrystaat het nie oornag gebeur nie, maar ná net duskant twintig jaar van volgehoue veldbestuur, het die risiko van droogte van 65% tot 20% afgeneem.
Boonop kan mnr. Arnold Griesel van Grootzuurfontein danksy sy verbeterde weiveldbestuur 225 meer ooie aanhou as in 2004 met die begin van die projek. Sy inkomste het die afgelope 18 jaar met R147 per hektaar verhoog, en sy inkomste ná voerkoste beloop R1 729,60 per ooi.
Dele van die plaas wat aanvanklik in ’n swak tot baie swak toestand was, het danksy die wetenskaplike weidingsbestuursbenadering aansienlik verbeter. Waar die kampe aanvanklik deur onsmaaklike karoobossies (hoofsaaklik bekkersbos en bitterbos) en fynkweekgras oorheers is, is die hooggewenste vingergras en gewenste krulblaar tans die dominante plante, terwyl rooigras ook aansienlik vermeerder het en tans op