Suid-Afrika se ambisie om ’n wêreldleier in die groen waterstofbedryf te word, is in November 2022 deur pres. Cyril Ramaphosa aan die groot klok gehang toe hy die potensiaal en voordele van dié hernubare kragbron tydens sy openingsrede van die land se eerste groen waterstofberaad in Kaapstad uiteengesit het.
Groen waterstof geniet volgens hom voorkeur binne die regering se plan vir die land se oorgang na laer koolstofvrystellings en klimaatveerkragtigheid. Om dit te bewerkstellig, sal sowat $98 miljard (R1,5 biljoen) oor die volgende vyf jaar nodig wees.
Volgens Ramaphosa bied die groeiende wêreldwye vraag na groen waterstof en sy afgeleide produkte aan Suid-Afrika ’n unieke geleentheid om sy minerale en hernubare hulpbronne te gebruik om industrialisasie aan te dryf, werk te skep, beleggings te lok, landelike gebiede te ontwikkel en weg te beweeg van fossielbrandstof.
Die departement van hoër onderwys, wetenskap en innovering doen al sedert 2007 navorsing oor die vervaardiging van groen waterstof. Volgens Ramaphosa het Suid-Afrika die potensiaal om teen 2050 van 6-13 miljoen ton groen waterstof en afgeleide produkte te produseer, waarvoor 140-300 GW se hernubare krag nodig sal wees.
Volgens Ramaphosa bou dié beraad oor groen waterstof voort op ’n beraad vir die ontwikkeling van volhoubare