VOORUITSKOUING Klimaat
Beriggewing oor planne om kweekhuisgasvrystellings te beperk en aardverwarming in toom te hou, bangmaakstories, regerings se verbintenisse tot groener ekonomieë en oliemaatskappye se wandelgangpolitiek om hul posisie te handhaaf, bereik elke November en Desember ’n hoogtepunt.
Dit val saam met die jaarlikse vergadering van partye, die sogenoemde COP-byeenkomste, wat oplossings soek om aardverwarming te beperk en die oorgang na groener stelsels moontlik te maak.
Byna 200 lande het in 2015 in Parys, Frankryk, onderneem om kweekhuisgasvrystellings sodanig te verlaag dat die gemiddelde aardtemperatuur nie met meer as 1,5 °C toeneem nie.
Hoewel Suid-Afrika hom tydens klimaatsonderhandelinge gewoonlik by die ontwikkelende wêreld skaar, is hy een van die wêreld se toptwintig vrystellers van kweekhuisgasse.