KORTOM
■ Die vleisbeesboer moet daarna streef om winsaandrywers, soos vrugbaarheid en groei, te verbeter en koste-aspekte, soos voeruitgawes, te beperk.
■ Prestasietoetsing van jong stoetbulle as potensiële teelbulle vir stoeterye, asook kommersiële kuddes is uiters belangrik.
■ Die meet van individuele voerinname kan nie onderskat word nie, want dit kan ’n verskil van duisende rande per bul beteken as die dier nie prestasiegetoets is nie.
Boere het talle kwessies om die kommersiële waardeketting optimaal te benut, asook om hul boerdery-onderneming volhoubaarder en winsgewender te maak.
Die hoër inflasiekoers wat tans ondervind word, beteken ’n toename in insetkoste, wat ’n moeiliker omgewing skep om volhoubaar te wees.
Bestuur is altyd een aspek van die boerdery wat kan verbeter, al beteken dit slegs ’n verbetering in biosekerheid op die plaas om die kudde teen eksterne siektes te beskerm.
Ons het onlangs die nadelige impak van bek-en-klouseer op die bedryf ervaar. Goeie bestuur sluit egter ook goeie besluitneming of seleksie van goeie teelmateriaal in om die kudde se prestasie te verbeter.
