Elke jagter het sekere rituele en gelowe van hoe die ideale jagtog moet lyk. Oor ’n periode van net oor die 30 jaar van hoofsaaklik te voet jag, het ek hierdie rituele en gelowe ook nie vrygespring nie. Een van die rituele is om slegs op die laaste dag van die jagtog in die area rondom my kampboom te jag en die hele jagtog dan te voet vanaf die kampboom te voltooi voordat die bakkie die bok gaan oplaai.
KAMPPLEK
Gedurende Junie 2021 het ek weer, ná ’n afwesigheid van sewe jaar, op De Hemelstraat gaan kamp opslaan. Die kamp het uit ’n ou witgatboom bestaan wat die afge-lope 20 jaar op De Hemelstraat as my primitiewe blyplek gedien het. Aanvanklik het ek in ’n tent geslaap, maar het later ’n kampsleepwa saamgeneem vir effe meer gerief. Die sleepwa het ’n daktent gehad en die bokke is binne-in die sleepwa gelaai wanneer die jagtog ná twee weke geëindig het.