My eerste ondervinding met ’n 6mm-kalibergeweer in die jagveld was ongeveer 30 jaar gelede. Ek en my vrou was onderweg na ons huis in Mosselbaai ná ’n besoek aan ’n taksidermis in Tarkastad. Op pad terug deur die pragtige Baviaansriviervallei het ons op ’n vriend se plaas naby Bedford oorgeslaap. Die boer het goedgunstiglik daarop aangedring dat ek ’n takbok saam met my huis toe neem. Aangesien ek my nie twee keer laat nooi om te jag nie, het ek sy vriendelike aan-bod aanvaar.
Vroeg die volgende oggend het die boer ’n ou, effens verweerde Remington 700-geweer met ’n Leupold 3-9x40-teleskoop en ’n pakkie PMP .243 Winchester-ammunisie aan my oorhandig. Op die 100-meterskietbaan, in ’n ou erosiesloot ’n paar honderd treë van die huis af, het dié geweer drie 100 greinkoeëls in ’n duimnaelgrootte groepering omtrent ’n duim bo die kol geskiet.
Effens minder as ’n uur later het ek ’n jong takbokram oorkant ’n vlak klofie gewaar. Versigtig het ek tot by ’n droë boom ±200 meter van die bok af beweeg en dooierus teen die stam gevat. Die rammetjie het skuins na my