Wêreldneigings wys rigting vir SA landbou
Die Organisasie vir Ekonomiese Samewerking en Ontwikkeling (OESO) en die Voedsel-en-landbou-organisasie (VLO) het pas hul tienjaarsiening bekend gemaak vir wêreldlandboumarkte, wat volgens hulle ’n riglyn kan gee vir beplanning. Hulle gee vooruitsigte van markgroei en
-pryse op wêreldvlak, maar ook op streekvlak vir die belangrikste landbouprodukte.
Die Suid-Afrikaanse landbou moet met bitter min beskerming met invoer meeding, terwyl die kommersiële landbou feitlik die helfte van sy inkomste met uitvoer verdien. Internasionale markte en pryse bepaal die verloop van die plaaslike graan- en veemarkte, asook vrugte-uitvoer. Dit is dus raadsaam om kennis te neem van wat die kundiges in die volgende dekade vir landboumarkte verwag.
