Snelle vrugbaarheid volgens die Schneider-patroon
KORTOM
■ Oorplaatjies verskaf inligting oor koeie se bewegingspatroon in die veld, wat ’n beheer-en-ontvangstasie opvang.
■ ’n Afwyking van die normale gedrag dui op bronstigheid. Dit stel die boer in staat om daardie vroulike dier op die ideale tyd kunsmatig te insemineer.
■ Dit bevorder die vrugbaarheid in die kudde, wat daartoe lei dat die produksie, inkomste en wins verhoog word.
Die Schneider-familie van Grootfontein in die noorde van Namibië bly aan die voorpunt van wetenskaplike boerderymetodes wat genetiese vordering versnel. Die vorige suksesverhaal was voerdoeltreffendheid, en die klem skuif nou na akkurate seleksie vir vrugbaarheid.
Die Schneiders – Mecki en sy vrou, Brigitte, hul seun, Reimo, en skoondogter, Sonja – besit die Okabra Brahman- en Okasim Simmentaler-stoetery en boer ook met kommersiële beeste. Die hoofplaas is Okamutombe buite Grootfontein waar hulle onlangs ’n boeredag gehou het om besoekende boere oor hul wetenskaplike boerderymetodes en jongste navorsing in te lig.
Reimo het vertel hoe hulle beesmonitering toepas in hul seleksie vir vrugbaarheid. Dit is gegrond op navorsing deur SenseHub van Allflex die afgelope 20 jaar oor beeste se gedrag, hoofsaaklik vir Bos taurus-beeste. Die oorspronklike navorsing is in Israel gedoen.
Hulle het in 2019 en 2020 soortgelyke navorsing saam met SenseHub op Okamutombe gedoen om Bos indicus-beeste te monitor, want bewegingspatrone van die Bos taurus en Bos indicus verskil.
Aanvanklik is net oorplaatjies gebruik (voordelig in beboste dele), maar onlangs is sensors op halsbande ook gebruik
