Seleksie begin met ’n goeie plan
Die seleksie van doeltreffende bulle en koeie begin by ’n goeie plan. Gaan prakties te werk, stel ’n plan op en selekteer daarvolgens met jou oog heeltyd gerig op die ekonomie, klimaat, omgewingsaktivisme, verbruikersvoorkeure en tegnologie.
Prof. Frikkie Neser, beesboer, hoogleraar en wetenskaplike verbonde aan die Universiteit van die Vrystaat in Bloemfontein, en mnr. Martin Seyfferdt, internasionaal erkende interras-beesbeoordelaar, het op die LRF-Veeskool in ’n gesamentlike lesing oor doeltreffende koei- en bulseleksie gesê seleksiedoelwitte moet die produksie-omgewing weerspieël omdat daar groot verskille in die omgewings is waarin boere hul bestaan maak. “Koop dus ’n bul wat by die omgewing aangepas is. Moet ook nie vir te groot of te klein beeste selekteer nie, maar volg ’n goue middeweg.”
KLIMAATSVERANDERING
Neem in ag dat klimaatsverandering ’n werklikheid is, ’n stresuitwerking op vee het en boerdery gaandeweg erger beïnvloed. Weerspatrone in ’n warmer klimaat gaan kalwers se groei benadeel. Rasse wat makliker aanpas, word aanbeveel, byvoorbeeld inheemse rasse.
Hulle het gesê omgewingsaktiviste is ’n werklikheid en daardie mense hou die landbou goed dop wat boerderymetodes betref. Veeboere word dikwels daarvan beskuldig dat hul vee te veel metaangas vrystel. Doeltreffender boerdery met ’n kleiner koolstofspoor is die antwoord. Die produktiwiteit van beeste in Amerika het van 1977 tot 2007 skerp toegeneem. Die karkasse lewer 22% meer vleis, die ouderdom wanneer beeste geslag kan word, het met 21% afgeneem en die totale produksie van beesvleis het met 11% gestyg. Nog ’n gunstige gevolg is dat die beesbevolking
