ONTGIN SÓ DIE BOERBOK-‘GOUDMYN’
Dubbelsyfergroei word in die bokbedryf ervaar – sonder enige inspanning – en met die ontwikkeling van ’n handelsmerk kan dié winsgewende kleinvertakking rekordgroeisyfers behaal.
Die vraag na lewende bokke in Suid-Afrika beloop 1,7 miljoen en oortref die aanbod verreweg. Om alles te kroon verdubbel dié syfer, wat meestal op tradisionele markte verkoop word, elke vyf jaar.
Mnr. Albie Horn, bokboer van Kuruman en De Aar, het op die jaarlikse LRF Veeskool by Aldam gesê meer bokke moet vir die kleinhandel geteel word. “Aangesien Afrika tans net 20% van die bokvleis lewer wat op die wêreldmark verkoop word, is daar ruim uitbreidingsgeleenthede.”
Horn boer met SA Boerbokke, Kalahari Reds en Blackberrys – onderskeidelik die gewone wit-en-rooi, rooi en swart Boerbokke – by Kuruman en De Aar. Hy het die swart bokke eiehandig geteel en was saam met ander pioniers medeverantwoordelik vir die ontwikkeling van die Kalahari Red. Hy hou ook Dorpers en wit Dorpers aan.
