WAT OORBLY VAN DROOM
‘KOM, klim, ek gaan wys julle waar is Theuns se gunstelingplek op die plaas.”
Oom Willie Jordaan klim agter die stuur van die 4x4 en ons ry die steil pad uit. Oor die klipperige pad, stadig en skud-skud. Deur ’n hek, nog ’n hek, nog ’n hek. Op pad is daar ’n bord teen ’n boom.
Droompad
Kom saam.
Hoër as die wolke, tussen die sterre en die maan, in die oneindigheid. In die melkweg die Skepper en ons saam.
“Wie het dit geskryf?” vra ek.
“Ek het,” sê oom Willie.
Ons kruie verder op tot by die bopunt. Klim uit en stap nader. Die uitsig slaan jou asem weg. Damme water lê so ver soos die oog kan sien. Daar is ’n duisend skakerings van groen. ’n Houthuisie met ’n stoep wat ’n paar jaar gelede gebou is staan bonkig op die rant.
Wanneer die son later bloedrooi sak, sê oom Willie: “Dis alles net genade.” En dan: “Maar daar is soveel vrae. Vyftig. Hy was maar net 50.”
Oom Willie en tannie Maryna Jordaan het die afgelope twee dekades as’t ware deel van die Afrikaanse musiekbedryf geword. Toe Theuns in 2000 vir die eerste keer op die gratis verhoë by die KKNK opgetree het, was hulle daar. Later Aardklop, Skouspel, feeste die land vol. Altyd net daar. Nie opdringerig nie. Nooit verwag dat hulle spesiaal behandel moet word nie. Net daar om hul seun te ondersteun. Oom Willie en tannie Maryna; Theuns se pa en ma.
Met Theuns se begrafnis op 27 November verlede jaar was oom Willie alleen daar. Theuns se suster, Linda,
