Covid-19 gee lemoene weer kans in die kollig
Dink aan vitamien C, en die prentjie van ’n lemoen kom onwillekeurig in jou geestesoog op. Deur die jare het dié sitrusvrug die rolmodel geraak om verkoues weg te jaag en mense se immuunstelsel ’n hupstoot te gee.
“Suid-Afrikaners sal nie sommer die skyfies lemoene vergeet wat tydens halftyd met skolesportwedstryde uitgedeel is nie. Lemoene is nog altyd beskou as dié bron van energie en gesondheid,” vertel me. Lianne Jones, bestuurder van PMA in Suid-Afrika.
Tydens die wêreldwye covid-19-pandemie het lemoene, wat eintlik die afgelope jare moes terugstaan vir spoggeriger sagtesitrus, weer eens op die voorgrond getree en verbruikers se voorkeurkeuse geraak om vitamien C op die natuurlike manier te kry.
Oor die algemeen het sitrusvrugte uitstekend gevaar sedert die eerste inperkings weens die koronaviruspandemie ingestel is.
Mnr. Joe Shaw Roberts, direkteur van verbruikersinsigte by Kantar, ’n wêreldbekende data- en konsultasiemaatskappy, sê sitrus het markaandeel weggevreet by alle ander vrugtipes. “Steenvrugte, piesangs, bessies en druiwe het almal verloor teen sitrus.
